SQO-da tereze jýmaq bolǵan áıel 4-qabattan qulap, aýyr jaraqat aldy

PETROPAVL. KAZINFORM — Soltústik Qazaqstan oblysynda dárigerler joǵary qabattan qulap, aýyr jaraqat alǵan, júregi toqtaǵan áıeldiń ómirine arasha tústi.

Petropavl qalalyq kópbeıindi aýrýhananyń málimetinshe, dárigerler 41 jastaǵy áıeldiń ómiri úshin úsh aıǵa jýyq kúresti. 

Aýyr jaraqat alǵan áıel bıyl sáýir aıynda tereze jýyp jatyp, tórtinshi qabattan qulap ketken. Ony travmpýnktke aparmaı-aq, óte nashar kúıde dereý jansaqtaý bólimine jatqyzady. Birer saǵattan keıin naýqastyń júregi toqtap qalyp, tek reanımatsııalyq sharalardyń altynshy mınýtynda ǵana júregi qaıta soǵa bastaıdy.

— Osydan keıin áıeldiń ómiri úshin kúres bastaldy. Patsıent 24 kún boıy ókpeni jasandy jeldetý apparatyna qosylyp, reanımatsııada jatady. Ol bas súıek-mıdyń aýyr jaraqatyn, mıdyń aýyr dárejeli jaraqatyn alǵan. Bas súıegi, eki jaǵy, ıyǵy, keýde omyrtqasy, jambasy synǵan. 3B tıpti jambastyń ashyq synýy, qulaq qalqanynyń jarylýy, ókpeniń jaraqaty, gemopnevmonııa, 2-3 dárejeli travmatıkalyq shok, tynys alý fýnktsııasynyń jetkiliksizdigi jáne taǵy da basqa asqynýlar tirkeldi, — deıdi aýrýhana dárigerleri.

Jaqynda áıelge sol jaq jambastan Hoffman apparatyn alyp tastaý boıynsha josparly ota jasaldy. Bul — onyń altynshy operatsııasy.

— Naýqas qazir travmatologııa bólimshesinde, jaı-kúıi ortasha aýyr. Eń aýyr kezeń artta, ol tiri qaldy jáne ómir úshin kúresti jalǵastyryp jatyr. Alda aǵzany qalpyna keltirý mindeti tur, — deıdi mamandar.

Buǵan deıin SQO-da jarty jylda 22 myń aýyl turǵyny mobıldi medkeshen arqyly tekserilgenin jazǵan edik.