SQO-da temperatýralyq rekord tirkeldi
PETROPAVL. QazAqparat – Soltústik Qazaqstan oblysynda temperatýralyq rekord tirkeldi, dep habarlaıdy QazAqparat tilshisi.
SQO – klımaty qubylmaly óńir. Bıylǵy qys muny taǵy bir dáleldep berdi. Birer apta buryn qys qaharyna minip, sary aıaz qysqan edi.
«Qazgıdromet» RMK SQO fılıalynyń málimetinshe, sol joly Salehardtan kelgen antıtsıklon búkil Qazaqstan aýmaǵyna áser etti.
Endi sınoptıkterdiń aıtýynsha, respýblıkaǵa Atlantıkalyq tsıklon jaýyn-shashyn men jylylyqty ákeldi. Aqpanda jaýǵan qardyń arty jańbyrǵa ulasty.
Al keshe, ıaǵnı 2021 jyldyń 6 aqpanynda Petropavldaǵy meteorologııalyq stansa +3,3 gradýsty tirkedi. Bul sońǵy 84 jyldyń ishindegi eń jylysy bolyp otyr.
Mamandardyń aıtýynsha, byltyr da osy 6 aqpan jyly bolyp, synap baǵanasy +1,8 gradýsty kórsetken eken. 2016 jyly da osy kúni dál osyndaı temperatýra tirkeldi.
Degemen aldaǵy kúnderi kún sýytady. Máselen 8 aqpanda aýa temperatýrasy túnde mınýs 14-19, keı jerlerde 22 gradýs aıaz bolmaq, kúndiz mınýs 13-18, keı jerlerde 9 gradýs sýyq. Ońtústik batystan soǵatyn jel soltústik batysqa aýysady, kúshi 15-20, ekpini 23-28 m/s.
Sondaı-aq 7-8 aqpanǵa óńirde daýyldy eskertý jarııalandy.
