SQO-da temirjolda eki adam mert bolyp, bireýi aýyr jaraqat aldy
PETROPAVL. QazAqparat – Soltústik Qazaqstan oblysynda poıyz soǵyp, aýyr jaraqat alǵan áıeldiń aty-jóni jáne týystary anyqtalyp jatyr. Jalpy bıyl temirjolda 3 oqys oqıǵa tirkeldi, eki adam mert boldy, dep habarlaıdy QazAqparat tilshisi.
Petropavl stansasy jelilik polıtsııa bóliminiń málimetinshe, temirjolda bıyldyqqa úsh oqys oqıǵa tirkelgen. Naýryz aıynda er adamdy poıyz soǵyp ketse, Mamlıýtkada 1976 jyly týǵan áıel ózine qol jumsap, poıyz astyna túsken.
«Temirjol oblys aýmaǵynda onnan astam eldi mekendi basyp ótedi. Oqys jaǵdaılar negizinen osy aýyldardyń mańynda tirkeledi. Turǵyndar joldy qysqartpaq bolyp, belgilenbegen jerden ótpek bolady. Arty qaıǵyly aıaqtalyp jatady.
Halyqpen profılaktıkalyq jumys únemi júrgiziledi. Joldy qysqartyp, ýaqytty únemdeımin dep basty qaterge tikpeý qajettigin eskertemiz. Reıdter ótkizemiz. Zań boıynsha jazalaımyz. Temirjoldy belgilenbegen jerden kesip ótpek bolǵandar birinshi ret eskertiledi, keıin aıyppul salynady», - deıdi Petropavl stansasy jelilik polıtsııa bólimi ákimshilik polıtsııa bólimshesiniń bastyǵy Abzal Rahıev.
Aıyppuldyń mólsheri – 3 AEK. Jyl basynan beri QR ÁQBtK-nyń 559- babynyń 5-bóligimen ıaǵnı, temir jol arqyly belgilenbegen jerden ótkeni úshin 633 adam ákimshilik jaýapqa tartyldy.
Byltyr SQO-da temirjolda 6 adam mert boldy. Onyń bireýi ózine qol jumsap, poıyz astyna túsken eken.
Buǵan deıin poıyz soqqan ájeıdiń týystary izdestirilip jatqanyn aıtqan edik. Búginde aýyr jaraqat alǵan áıeldiń aty-jóni naqtylanyp jatyr.
