SQO-da temirjolda bıyl eki adam mert boldy
Ońtústik-Oral temirjoly Petropavl bólimshesiniń málimetinshe, qaýipsizdik erejesin saqtamaýdan eki adam temirjolda mert boldy. Byltyr osy merzimde 4 adam osylaı kóz jumǵan edi.
Jalpy bıylǵy 7 aıdyń ishinde Ońtústik-Oral temirjolynda poıyz basyp ketý, elektr togy soqýy sekildi 40 jaǵdaı tirkelgen. Saldarynan 40 adam jaraqat alsa, sonyń 31-i qaıtys boldy. Byltyr osy ýaqytta 27 adam mert bolsa, taǵy 10-y jaraqat alǵan.
«Kólik oqıǵalaryn tergeý barysynda, oqys oqıǵalarǵa negizinen adamdardyń ózi kináli ekendigi anyqtaldy. Olar jeke bas qaýipsizdigin saqtamaı, temirjoldy arnaıy belgilenbegen jerden jáne kele jatqan poıyzdyń aldynan kesip ótpek bolǵan», - delingen habarlamada.
Júıeli júmys nátıjesinde bıyl balalar men jasóspirimder arasynda qaıǵyly jaǵdaı tirkelgen joq. Temirjol qyzmetkerleri mektepterde balalarmen kezdesip, túsindirý jumysyn júrgizedi. Arnaıy rolıkter men mýltfılm de túsirilgen.
«Temirjol – asa qaýipti nysan, sol sebepti tıisti erejeni qatań saqtaǵan jón. Temirjoldy arnaıy belgilengen jáne jaraqtandyrylǵan jerden, sáıkes jol belgileri bar jolaýshylar ótkelinen, tonnelden, kópirden, temirjol ótkelderinen kesip ótý qajet. Ótpes buryn kele jatqan poıyzdyń joqtyǵyna kóz jetkizý kerek», - deıdi temirjol qyzmetkerleri.
