SQO-da temirjol tuıyqtarynda qysqa arnalǵan 38 myń tonna kómir tur
PETROPAVL. QazAqparat – Soltústik Qazaqstan oblysynda kómir bıyl da qymbattamaıdy. Óńir basshysy Qumar Aqsaqalov turǵyndardy qysqa erte bastan qamdanýǵa shaqyrdy, dep habarlaıdy QazAqparat tilshisi.
SQO ákimi Qumar Aqsaqalovtyń aıtýynsha, oblystaǵy bıýdjettik mekemeler 73 myń tonna kómir ázirledi. Bul - bar qajettiliktiń 51%. Ázirge josparǵa saı keledi. Kómir baǵasy eki jyldan beri ózgergen joq. Qadaǵalanyp, qymbattatýǵa jol berilmeıdi.
Al jeke sektorda turatyn oblys turǵyndary jylyna 380 myń tonna kómir paıdalanady. Olar arqany keńge salyp, qysqy jylytý maýsymyna daıyndalýǵa asyǵar emes.
«Qazirgi ýaqytta turǵyndar 90 myń tonnadan sál asatyn kómirdi satyp alǵan. Bul nebary suranystyń 20% ǵana. Sol sebepti jurtty kúz ben qysty kútpeı, osy bastan qamdanýǵa shaqyramyn. Qazir oblystyń temirjol tuıyqtarynda 38 myń tonna kómir jatyr», - deıdi Qumar Aqsaqalov.
Bıyl óńirdiń 5 aýdanyndaǵy 53 eki qabatty turǵyn úı ortalyqtandyrylǵan jylytý júıesine qosylady. Bul úılerdiń 2 myńnan astam turǵyny bar.
«Aıyrtaý, Aqjar, Esil jáne Shal aqyn aýdandarynda bıomassamen jumys isteıtin qazandyqtar ornatylady. Olar óte únemdi. Qazir birneshe jyl buryn jylytý jelisinen ajyratylyp tastalǵan kóp qabatty úılerdi qosý úshin jóndeý jumystaryn bastadyq», - deıdi óńir basshysy.
