SQO-da tekserilgen memlekettik organdar ǵımarattarynyń ár tórtinshisinde ǵana pandýs bolǵan

PETROPAVL. KAZINFORM – Soltústik Qazaqstan oblysynda memlekettik organdar ǵımarattaryna monıtorıng júrgizilip, pandýstardyń bolýy jáne olardyń normatıvtik talaptarǵa sáıkestigi tekserildi.

Memlekettik qyzmet isteri agenttiginiń SQO boıynsha departamentiniń málimetinshe, monıtorıng departamenttiń memlekettik qyzmet kórsetý máseleleri jónindegi vedomstvoaralyq jumys tobynyń bastamasymen uıymdastyryldy. Nátıjesinde 25 memlekettik mekeme jospardan tys tekserildi. Sonyń 19-ynda zańbuzýshylyqtar anyqtalǵan.

- Aqjar aýdanynda tórt aýyldyq okrýg ákim apparaty, Aqjar aýdany polıtsııa bólimi, Aqjar aýdanynyń arhıvinde, Aıyrtaý aýdany úsh aýyldyq okrýg ákimi apparaty ǵımaratynda, Esil aýdany sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi, veterınarlyq stantsııa, ıAvlenkanyń №1 mektebi ǵımaratynda, Ýálıhanov aýdany sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi, Іshki saıasat bólimi, aýyl sharýashylyǵy bólimi jáne M.Jumabaev aýdany Polýdınskıı, Chıstovskıı aýyldyq okrýgteriniń ákim apparattary, ekonomıka jáne qarjy bólimi ǵımarattarynda pandýs bolmady, - deıdi Memlekettik qyzmet isteri agenttiginiń SQO boıynsha departamenti mamandary.

Petropavldaǵy SQO boıynsha Ekologııa departamenti de talapqa saı bolmady. Anyqtalǵan olqylyqtardy joıý merzimin kórsete otyryp, 19 memlekettik mekemege uıǵarym shyǵaryldy.

Sondaı-aq 2 uıym - SQO boıynsha ekologııa departamenti jáne ıAvlenkanyń №1 mektebi Ákimshilik quqyq buzýshylyq týraly kodekstiń 83-baby boıynsha ákimshilik jaýapkershilikke tartyldy.

Buǵan deıin Pavlodarda múgedekterdiń taktıldi jolaqtary men pandýstary talapqa saı bolmaǵanyn jazǵan edik.