SQO-da tehnıkalyq qadaǵalaý sarapshylary jol jumysyn qaǵaz júzinde baqylap kelgen

PETROPAVL. KAZINFORM – Soltústik Qazaqstan oblysynda tehnıkalyq qadaǵalaýdyń bir sarapshysy bir mezgilde birneshe nysanda jumystyń sapasyn baqylaıtyny anyqtaldy.

SQO sybaılas jemqorlyqqa qarsy qyzmettiń málimetinshe, vedomstvo jol qurylysy salasyndaǵy sybaılas jemqorlyq táýekelderine syrtqy taldaý júrgizdi. Nátıjesinde tehnıkalyq qadaǵalaý jumysynda júıeli zań buzýshylyqtardy anyqtady.

Óńirde avtojol jóndeý boıynsha 160 jobany tehnıkalyq qadaǵalaýdyń barlyǵy 99 sarapshy baqylaıdy, onyń ishinde 48 sarapshy eki jáne odan da kóp nysandarǵa bekitilgen.

«Injınırıngtik qyzmet kórsetýdiń qoldanystaǵy erejelerine sáıkes tehnıkalyq qadaǵalaý jónindegi sarapshy qurylys-montajdaý jumystarynyń sapasyn turaqty negizde tekseredi. Alaıda, normatıvtik qujatta bir kezeńde baqylanatyn nysandardyń sany boıynsha shekteý joq.

Bul kemshilik eleýli olqylyq bolyp tabylady jáne qurylys-montajdaý jumystaryn júrgizý sapasyna teris áser etedi, óıtkeni bir adam bir ýaqytta birneshe nysandy fızıkalyq turǵyda tekserispen qamtı almaıdy. Sybaılas jemqorlyq táýekelin joıý úshin departament taldaý nátıjeleri boıynsha tıisti usynymdar engizetin bolady», - dedi SQO sybaılas jemqorlyqqa qarsy qyzmet mamandary.

Sonymen qatar, departament taldaý jumysy barysynda smetany asyra baǵalaý, sapasyz materıaldardy paıdalaný, kózdelmegen jumys túrlerin qosý arqyly bıýdjet qarajatyn tıimsiz jumsaý jáne t.b. sybaılas jemqorlyq táýekelderin anyqtady.

Tekseris nátıjeleri boıynsha ashyq rásimderdi, tsıfrlyq sheshimderdi engizý jáne ozyq sheteldik tájirıbeni eskere otyryp, salada baqylaýdy kúsheıtý jóninde sharalar keshenin qabyldaý josparlanǵan.

Jol qurylysy salasyndaǵy buzýshylyqtar týraly málimetteri ne ony jetildirý boıynsha usynystary bar azamattar Sybaılas jemqorlyqqa qarsy qyzmettiń oblystyq departamentine júgine alady.

Buǵan deıin SQO-da tasqynnan zaqymdanǵan gıdrotehnıkalyq qurylystar eki aıda qalpyna keltiriletinin jazǵan edik.