SQO-da Taılandtan kelgen otbasy múshelerinen koronavırýs tabylmady
PETROPAVL. QazAqparat – Taılandta dem alyp kelgen petropavldyq otbasydan koronavırýstyń belgileri baıqalyp, olar aýrýhanaǵa tústi, dep habarlaıdy QazAqparat tilshisi.
Petropavlda áleýmettik jelilerde bet-aýzyn tumshalap, erekshe kıingen medıtsına qyzmetkerleriniń eki «jedel járdem» kóligine adamdardy otyrǵyzyp jatqany týraly beınerolık tarap ketti. Osy beınejazbaǵa baılanysty SQO Densaýlyq saqtaý basqarmasy túsinik berdi.
«Erli-zaıypty eki balasymen Taılandtan dene qyzýy kóterilip, aýyryp kelgen. Otbasynyń barlyq múshelerin qalalyq aýrýhananyń juqpaly aýrýlar bólimshesine koronavırýs juqty degen kúdikpen jatqyzdyq. Zertteý men zerthanalyq taldaý barysynda bizdiń kúdigimiz rastalmady. Áleýmettik jelide taralǵan beınejazbada medıtsınalyq qyzmetkerler tıisti áreket etý algorıtmi boıynsha jumys istedi», - delingen resmı aqparatta.
Qazirgi ýaqytta er adam qalalyq aýrýhanalardyń birinde, al onyń jubaıy men 3 jáne 7 jastaǵy eki balasymen oblystyq balalar aýrýhanasynyń juqpaly aýrýlar bóliminde em alyp jatyr. Dárigerlerdiń sózine qaraǵanda, naýqastar tumaý juqtyrǵan. Jaǵdaılary aýyr, ázirshe dene qyzýy túsken joq.
