SQO-da taıaz kólderdegi balyqtardy qutqarý úshin erekshe shara qolǵa alyndy
PETROPAVL. QazAqparat – Soltústik Qazaqstan oblysyndaǵy kólderde qoldan ottegimen baıytý jumystary júrgizilip jatyr, dep habarlaıdy QazAqparat tilshisi.
Balyqtardy qutqarý operatsııasy aeratsııa tásilimen júzege asyrylady.
Kóldiń betine oıyq jasalyp, sý ottegimen baıytylady.
«Aeratsııa jasaý úshin motorly burǵylar, motosorǵylar, aeratorlar jáne sýdaǵy ottegini ólsheıtin aksıometr qajet. Bıyl balyqty qutqarýǵa qańtar aıynyń ortasynan bastap kiristik. Qys aıazdy boldy, qar qalyń jaýdy. Keı kólderde muz qabaty 1 metrge deıin jetedi. Onyń ústinde 80 sm-ge deıin jetetin qar jabyndysy bar. Aýa jetpegendikten, ásirese taıaz kólderdegi balyqtar qyrylyp qalýy múmkin», - deıdi Sokolov memlekettik mekemesiniń mamany Sergeı Brıýhov.
Qyzyljar aýdanyndaǵy Prýd kóli – taıaz kólder qatarynan. Aýmaǵy 50 ga alyp jatyr. Munda móńke balyǵy kóp kezdesedi. Qazir kól sýynyń quramyndaǵy ottegi mólsheri nebary 1,2 % ǵana quraǵan. Balyqtardy qutqarý úshin kól ústinde qajetti tehnıkamen 8 adam jumys istep jatyr.
«Sokolov memlekettik mekemesiniń rezervinde osyndaı 23 kól bar. Oblys boıynsha balyq sharýashylyǵyna jaramdy 500-deı sý qoımasy bolsa, sonyń 300-i jalǵa berilgen. Jalǵa alǵandar aeratsııany óz kúshterimen júrgizedi. Al, balyqtardyń qyrylýyna jol bergen jaǵdaıda olarmen jasalǵan kelisimshart buzylady, jaýapkershilikke tartylady.
Al rezervtik sý qoımalarynda jergilikti atqarýshy organdardyń kómegimen bul jumystar júzege asyrylady. Sýdy ottegimen baıytýǵa jazda osy kólderde balyq aýlaıtyn balyqshylar da bıyl volonter retinde kómek berip jatyr», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bólim jetekshisi Erlan Táshimov.
