SQO-da táýlik boıy jumys isteıtin 1,5 myńǵa jýyq beınekamera bar

PETROPAVL. QazAqparat – Soltústik Qazaqstan oblysynda beınebaqylaý kameralarynyń kómegimen jarty jylda 11 myńnan asa quqyq buzýshylyq tirkeldi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńirde táýlik boıy 1451 beınebaqylaý kamerasy jumys isteıdi, onyń 410-y oblys ortalyǵynda ornatylǵan.

Qylmystar men quqyq buzýshylyqtardyń aldyn alý jáne ashýda beınebaqylaý júıesiniń kómegi zor.

Búgingi tańda tehnıkalyq quraldardyń kómeginsiz joldaǵy jáne qoǵamdyq qaýipsizdikti qamtamasyz etý, kóshedegi qylmystardy ashý múmkin emes.

Petropavl qalasy polıtsııasynyń jedel basqarý ortalyǵy 2008 jyly qurylǵan.

«102» jedel arnasyna habarlamalar men qońyraýlardy qabyldaý, kameralar boıynsha kósheler men qoǵamdyq oryndardaǵy jaǵdaıdy monıtorıngileý, polıtseı patrýlderdiń kúshteri men quraldaryn úılestirý.

Tájirıbeli polıtseılerden quralǵan kezekshi aýysym táýlik boıy ortalyqta qyzmet atqarady.

Alty aıda qalalyq polıtsııanyń «102» arnasyna qylmystar men quqyq buzýshylyqtar týraly 80 myń habarlama kelip tústi, 15 myńnan astamyna shuǵyl áreket etý talap etildi.

SQO PD shtabynyń aǵa ınspektory Alena Tkachenkonyń aıtýynsha, jyl basynan kameralardyń kómegimen 8353 ákimshilik quqyq buzýshylyq tirkelgen.

Onyń ishinde 6675 jol júrisi erejelerin buzýshylyq, sondaı-aq 1500 asa fakti qoǵamdyq oryndarda spırttik ishimdikterdi ishýge qatysty.

Sonymen qatar qylmystardy ashýǵa yqpal etken 140 fakti: onyń ishinde 47 urlyq pen 18 buzaqylyq deregi anyqtalǵan.

Jalpy oblys boıynsha kameralardyń kómegimen 11 myńnan astam quqyq buzýshylyq anyqtalyp, 451 qylmys ashyldy.

1 aqpannan bastap kezekshi bólimderdiń jáne jedel basqarý ortalyqtarynyń jumysyna jańashyldyq engizildi: polıtseıler quqyq buzýshylyqtar týraly mátindik habarlamalar men foto, vıdeo materıaldardy birizdi baılanys qaǵıdaty boıynsha «102» mobıldi qosymshasy arqyly qabyldaıdy (QR ІІM arnaıy mobıldi qosymshasy, ony App Store, nemese Google Play arqyly júkteýge bolady).

Búgingi tańda birizdilik arqyly jedel basqarý ortalyǵyna 169 habarlama kelip tústi, onyń 13 vıdeo, qalǵany – mátin túrinde.

144 habarlama boıynsha kináli adamdar ákimshilik jaýapkershilikke tartylǵan, 2 ótinim tirkelgen.

Qalǵany boıynsha quramynda qylmys bolmaýyna baılanysty materıaldar nomenklatýralyq iske jazyldy.

Kún saıyn Petropavlda qoǵamdyq tártipti saqtaý maqsatynda 200-den astam polıtseı kezekshilikke túsedi.

Olar 5 modýlde jáne 57 jaıaý baǵytta kezekshilik atqarady, jol qaýipsizdigin 26 avtopatrýl qamtamasyz etedi.