SQO-da táýlik boıy muzdy buzý jumystary júrip jatyr
PETROPAVL. QazAqparat - SQO Ýálıhanov aýdanynda qutqarýshylar Sileti ózeninde tasqyn qaýpi bar ýchaskede muz qursaýyn buzý jumystaryn táýlik boıy júrgizip jatyr, dep habarlady SQO TJD baspasóz qyzmetine silteme jasap «QazAqparat» HAA tilshisi.
Sileti ózeniniń ereksheligi - arnalar men dambalardyń bolýynda. Muzdy buzý Qulykól men Qaratal aýyldary arasynda sýdyń erkin ótýin qamtamasyz etedi. Qutqarýshylar tereńdikti ólshedi. Sý deńgeıi baıaý qarqynmen artyp keledi. TJD baspasóz qyzmetinde Siletidegi jaǵdaı baqylaýda ekenin atap ótti.
Qutqarýshylar qaýipti ýchaskelerdi torýyldap, polıtseılermen birge sý tasqynynan zardap shegýi múmkin úılerdi aralady. Qulykól men Qaratal kentiniń turǵyndaryna evakýatsııa jarııalanǵan kezdegi birinshi kezektegi is-áreket túsindirildi, maldardy jetkizý oryndary kórsetildi.
Taıaý kúnderi SQO-da aýa temperatýrasy kóterilip, qar erı bastaıdy. Óńir sý tasqyny kezeńine erte daıyndaldy. Tasqynnyń der kezi, boljam boıynsha, sáýirdiń ekinshi onkúndigine keledi.
