SQO-da táýligine 800-900 adam vaktsına alady, bul az – sanıtar dáriger
SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, óńirde vaktsınatsııa qarqyny tómendegen. Ótken aıda táýligine 3-4 myń adam koronavırýsqa qarsy ekpe alsa, búginde olardyń sany 800-900 shamasynda ǵana.
«Vaktsınatsııa qarqynynyń tómendeýi oblystaǵy epıdemıologııalyq jaǵdaıǵa keri áser etedi. Ujymdyq ımmýnıtet qalyptastyrýǵa múmkindik bermeıdi. Ekpe almaǵan turǵyndar arasynda vırýs juqtyrý jaǵdaıy kúnnen-kúnge kóbeıip keledi», - deıdi Arman Kúshbasov.
SQO-da osy kúnge deıin 217 myń adam vaktsınanyń birinshi komponentin aldy, bul jospardyń 69,9 %-y. Ekinshi komponentin alǵandar sany 182 myńnan asady, ıaǵnı alýy tıis halyqtyń 58,7 %-y vaktsınatsııa kýrsynan ótti.
Shekteý sharalaryna baǵynbaı, úı karantınin buzatyndardy anyqtaýda Ashyq jobasynyń bereri mol. Qosymshany engizgen nysanǵa kirmek bolǵan osyndaı 14 adam jaýapkershilikke tartyldy.
Monıtorıngtik toptar da tamyz aıynda 185 reıd ótkizip, 1616 nysandy teksergen. Nátıjesinde 43 adamǵa 2,5 mln teńge shamasynda aıyppul salyndy.
«Jaǵdaıdy baǵalaý matrıtsasyna sáıkes biz bir aıdan artyq «qyzyl» aımaqtamyz, alaıda aptalyq kórsetkish boıynsha «qońyr-qyzyl» aımaqtamyz. Eger de ınfektsııalyq statsıonarlar 70 %-ǵa tolatyn bolsa, onda demalys kúnderine lokdaýn engizýge májbúr bolamyz. Sondyqtan sanıtarııalyq talaptardy oryndaýǵa shaqyramyn. Ol qoǵamdyq oryndarda maska taǵý, áleýmettik ara qashyqtyqty saqtaý, oıyn-toılardan bas tartý. Aýrýdyń belgileri – álsizdik, tamaqtyń qyrýy, bas aýrýy, dene qyzýynyń kóterilýi baıqalǵan jaǵdaıda birden dárigerge qaralǵan jón», - deıdi sanıtar dáriger.
