SQO-da taspa qurt juqpaly aýrýyn juqtyrǵandar sany artty
PETROPAVL. QazAqparat – Soltústik Qazaqstan oblysynda taspa qurt juqpaly aýrýyna (ehınokokkoz) shaldyqqandar sany sońǵy bir jylda eki ese artqan, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń bólim basshysy Merýert Atambaevanyń aıtýynsha, ehınokokkoz – aýyr gelmınttik aýrý. Onyń qozdyrǵyshy – jyrtqysh ańdardyń ishinde tirshilik etetin qurttar. Adamdarǵa ol ıtterden juǵady.
«Ittiń júninde de gelmınt jumyrtqalary bolýy múmkin. Úı janýarlarynda da ehınokokk qurty bolýy múmkin. Tórt túlik parazıtti jaıylymdarda juqtyrady», - deıdi ınfektsııalyq jáne parazıttik aýrýlardy epıdemıologııalyq baqylaý bóliminiń basshysy Merýert Atambaeva.
Oblys turǵyndary arasynda sońǵy jyldary ehınokokkozben aýyrǵandar sany ósken.
«Parazıttiń dernásili ishke túsken sátten bastap jetile bastaıdy. Ol asqazan-ishek jolyna túsip, óz qabyǵynan bosatylady jáne asqazannyń nemese ishektiń shyryshty qabaty arqyly qan men lımfaǵa enip, músheler men tinderge taralady. Onda ehınokokkty kópirshik ósýdi jalǵastyrady. Kólemi ulǵaıyp, parazıt kórshi organdarǵa qysym jasaıdy.
Ehınokokktyq kısta áli kishkentaı bolǵanda, naýqastarda eshqandaı shaǵymdar bola qoımaıdy. Bul kezeńde ehınokokkoz kezdeısoq anyqtalady. Atap aıtqanda, basqa aýrýǵa ota jasaý barysynda nemese profılaktıkalyq rentgenologııalyq tekserý kezinde», - deıdi sanıtar dáriger.
Mamannnyń aıtýynsha, adamnyń negizinen baýyr, ókpe, júregi zaqymdanýy múmkin. Baýyr ehınokokkozynyń ekinshi kezeńiniń klınıkalyq kórinisteri ártúrli. Kısta úlken mólsherge jetedi. Saldarynan baýyr, kórshi organdar qysylyp, qan aınalymynyń buzylýyna, tinderdiń jansyzdanýyna ákeledi.
«Kópirshikti suıyqtyq aǵzany ýlaıdy, allergııa paıda bolýy múmkin.
Naýqastardyń oń jaq keýde qýysynyń tómengi jartysy aýyrsynady. Keıde arqa jaǵy, epıgastrıı aımaǵy aýyrýy múmkin, ol fızıkalyq júkteme kezinde kúsheıedi. Oń jaq qabyrǵa astynda isik tárizdi paıda bolady. Salmaq joǵaltý, jalpy álsizdik, tábettiń buzylýy, júrek aıný jáne qusý, júrek soǵysy jáne entigý baıqalady», - deıdi Merýert Atambaeva.
Mamannyń sózine qaraǵanda, ehınokokkozben kúrestiń bir joly – qańǵybas ıtterdi aýlaý. Al ıti barlar ony únemi veterınarlarǵa kórsetip, teksertip otyrýlary qajet. Jylyna 4 ret degelmıntızatsııa júrgizýi kerek. Mal soıý kezinde ehınokokkozben zaqymdanǵan múshe tabylsa, ony tereń kómý nemese órteý qajet, olardy qoqys ornyna shyǵarýǵa nemese kárizge tastaýǵa bolmaıdy.
«Itterge naýqas janýarlardyń ishki múshelerin berýge qatań tyıym salynady. Ata-analar janýarlardy jaqsy kóretin balalarǵa aýlalarda jáne kóshede qańǵybas ıttermen oınaýǵa bolmaıtynyn túsindirýi tıis. Úı janýarlaryn súıýge, ortaq ydys-aıaqtan tamaqtandyrýǵa, as úıde ustaýǵa bolmaıdy», - deıdi sanıtar dáriger.
Byltyr SQO-da eki adamda ehınokokkoz tirkelse, bıyl 5 adam aýyrdy. Onyń ekeýi - Petropavl, qalǵandary Shal aqyn, Esil jáne Aıyrtaý aýdandarynyń turǵyndary.
