SQO-da tasqyn sýdyń beti qaıtty
PETROPAVL. QazAqparat - SQO-da kóktemgi tasqyn sýdyń beti qaıtty. Jergilikti qyzmetterdiń birlese qımyldaýynyń nátıjesinde birde-bir úıge sý kirgen joq, dep habarlaıdy QazAqparat tilshisi.
Soltústik Qazaqstan oblysynda kóktemgi sý tasqyny kezeńiniń qorytyndysy shyǵaryldy. Qazir oblysta jaǵdaı turaqty, sýdyń deńgeıi tómendep keledi.
SQO ákimi baspasóz qyzmetiniń habarlaýynsha, bıyl óńirde sý qory ótken jyldarmen salystyrǵanda 6 ese kóp boldy. Keshendi jumystardyń arqasynda úılerge sý kirgen joq.
«Bıylǵy kóktemgi sý tasqyny boıynsha jaǵdaı biraz ábigerge saldy. Qazir óńirdegi jaǵdaı turaqtaldy dep aıta alamyn. Shamamen 530 shaqyrym - 90 aýyldyń aınalasy sý kelmesteı bıiktetilip kóterildi. 20 myń metr sý qubyry tazartyldy. Tek Petropavl qalasynan ǵana 800 myń tekshe metr qar syrtqa shyǵaryldy. Shuǵyl qımyldaý úshin 1400 adam men 1200-deı tehnıka ázirlendi. Biz tasqyn sýǵa daıyn boldyq. Der kezinde jasalǵan jumystar óz nátıjesin berdi», - deıdi oblys ákimi Qumar Aqsaqalov.
Tasqyn sý 18 eldi mekenge deıin kelip, qaýipti jaǵdaı týdyrdy. Oblys ákimi Ýálıhanov aýdanynda apatty boldyrmaý úshin mol sý kelgennen turǵyndardyń qasynda bolyp, jaǵdaıdy baqylaýda ustady. Arnaıy qurylǵan shtabty ózi basqardy.
«Ýálıhanov aýdanyndaǵy Qýlykól men Qaratal aýyldaryna Aqmola oblysyndaǵy Sileti sý qoımasynan kóp mólsherde sý keldi. Meniń basqarýymmen shuǵyl shtab jumys istedi. Birlesken jáne jedel jumystyń arqasynda aýyldyqtar kóshirilip, jaǵany bekitý jumystary júrgizildi. Bul aýyldardyń janynda 70 mln tekshe metr sý jınaldy. Eger bógetti sý shaıyp ketse, eki metrlik tolqyn aýyldardy basar edi. Sondyqtan, tıisti qutqarý jumystary júrgizildi. Keshendi jumystardyń arqasynda tótenshe jaǵdaıǵa jol berilmeı, adamdardyń ómiri men múlkin saqtap qaldyq», - dedi Qumar Aqsaqalov.
Oblys ákiminiń aıtýynsha, byltyr sý ótkizgish 20 qurylǵy salynsa, bıyl taǵy 27-si qoıylady. Bul aldaǵy ýaqytta kóktemgi sý tasqynynyń jeńil ótýine jaǵdaı jasamaq.
