SQO-da tasqyn sýdan zardap shekken 35 myń adam syıatyn 325 pýnkt ázirlendi

PETROPAVL. QazAqparat – Soltústik Qazaqstan oblysynda kóktemgi sý tasqynyna ázirlik qyzý júrip jatyr. Zardap shekken halyqty ýaqytsha ornalastyrýǵa 35 myń adam syıatyn 325 pýnkt daıyndaldy, dep habarlaıdy QazAqparat tilshisi.

SQO tótenshe jaǵdaılar departamenti basshysynyń orynbasary Murat Qanǵojınovtyń aıtýynsha, óńirde alty myńǵa jýyq turǵyny bar 79 eldimekendi sý basýy yqtımal.

Onyń 30-y ózen sýynyń kóterilýinen, 13-i kólderdiń tolýynan jáne qalǵany erigen qar sýynan zardap shegýi múmkin.

«Sońǵy jyldary kóktemgi sý tasqynynyń zardabyn azaıtý maqsatynda aýqymdy jumystar atqaryldy. 160-tan astam eldimekennen sý basý qateri alyndy. 13 sý ótkizý qubyry ornatyldy, sý basýǵa asa beıim ýchaskelerde 119 km astam topyraq úıindisi jáne 7,5 km qorǵanys bógeti salyndy», - deıdi Murat Qanǵojınov.

Sý tasqynymen kúresý úshin oblysta quqyq qorǵaý organdary qyzmetkerlerinen quralǵan 484 adam, 155 tehnıka, 8 júzý quraly jáne 83 motopompa ázirlendi.

Jaǵdaı kúrdelener bolsa jergilikti atqarýshy organdardan qosymsha shamamen 1900 adam, 1473 tehnıka, onyń ishinde 316 sý sorǵysh tehnıka jáne 57 júzý qural y tartylady.

Kóktemgi sý tasqynymen kúreske 190 tonna janar-jaǵar maı, 32,4 myń tonna ınertti materıal jáne 27,8 myń qap ázirlendi.

Búginge deıin eldimekenderden 1 mln 900 myń tekshe metr qar shyǵaryldy, 1300-ge jýyq sý ótkizý qubyry tazartyldy. Ózenderdiń problemalyq ýchaskelerinde jarylys jumystary júrgizilip jatyr.

Kóktemgi sý tasqynynda zardap shekken turǵyndar bolyp jatsa, olar ýaqytsha 325 pýnktke ornalastyrylady.

Arnaıy jaraqtandyrylǵan oryndarǵa 35 myńnan astam adam syıady.