SQO-da tasqyn sý birneshe joldy shaıyp ketti
PETROPAVL. QazAqparat - Soltústik Qazaqstan oblysynda oblystyq jáne aýdandyq mańyzy bar joldardyń jeti tusyn sý basyp ketti, dep habarlaıdy QazAqparat tilshisi.
Sh.Ýálıhanov, Aqjar jáne Taıynsha aýdandarynda eldi mekenderdi jalǵaıtyn joldardy sý basty. Qazir bul jerlerde arnaıy tehnıkalar jumys istep jatyr. Beketter ornatylyp, kólikter aınalma joldarmen júrýge májbúr.
Oblystyq Tótenshe jaǵdaı departamenti mamandarynyń málimetinshe, eki táýliktiń ishinde Sileti sý qoımasynan SQO-ǵa 95 mln tekshe metr sý jiberilgen. Ýálıhanov aýdanyndaǵy eki aýyl - Qýlykól men Qaratal eldi mekenderi mańynda sý deńgeıi kóterilip, aýylǵa jetip jaqyndap qaldy. Oblys ákimi Qumar Aqsaqalov qaýip tóngen aımaqqa jetip, jaǵdaıdy baqylaýǵa aldy.
«Oblystyń shalǵaı eldi mekenderi bolǵandyqtan jetý qıyn boldy. Qazir ol jerde traktor, býldozer, ekskavator - barlyǵy 25 tehnıka jumys istep jatyr. Kómekke ózderiniń kerek-jaraqtarymen qutqarýshylar keldi», - deıdi SQO Tótenshe jaǵdaı departamentiniń bastyǵy Ramıl Kamalov.
Ýálıhanov aýdanyndaǵy Bereke aýylynda erigen qar sýy 200 adamdy elektr qýatynsyz qaldyrdy. Elektr baǵandary aǵyn sýǵa shydas bermeı qulaǵan. Sý deńgeıi túsisimen-aq qutqarýshylar qalypqa keltirý jumystaryn bastaıdy.
