SQO-da tasqynnan zardap shekkenderge baspana salǵan 15 kompanııa janjaldan keıin tıisti aqshalaryn aldy

PETROPAVL. KAZINFORM – Soltústik Qazaqstan oblysynda qurylys kompanııalary óńirdiń kásipkerler palatasy zańgerleri jáne prokýrorlardyń aralasýynan keıin tıesili 421 mln teńgeni aldy.

Qurylys kompanııalary byltyr Petropavlda kóktemgi sý tasqynynan zardap shekkenderge arnalǵan turǵyn úıler saldy. 2024 jyldyń qazan aıynda úılerdiń berilýine qaramastan, kóptegen kompanııa ózderine tıesili qarajattyń shamaly ǵana bóligin aldy. Mysaly, «Ash stroy» JShS sharttyń jalpy somasynyń 25% ǵana alǵan. Jaýapty «Qyzyljar Asar» qory 15 kásiporynǵa barlyǵy 421 mln teńge qaryz bolǵan. 

Másele qańtar aıynyń sońynda SQO kásipkerler palatasynyń kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste talqylandy. 

Keńestiń otyrysyna qatysqan «Qyzyljar Asar» qorynyń dırektory Qanat Omarov jobanyń negizgi demeýshisi – «Kaz Minerals Bozshakól» kompanııasynan sońǵy transhty alý keıbir kompanııalarda elektrondyq shot-faktýralardyń joqtyǵy qolbaılaý bolyp otyrǵandyǵyn túsindirdi. 

Tapsyrys berýshiniń ókili - SQO ákimdigi qurylys, sáýlet jáne qala qurylysy basqarmasy basshysynyń orynbasary Serikjan Shıtqanov 2024 jyldyń sońynda qurylysshylardan qorǵa qujattardyń tolyq paketin jibergenin rastady.

Qor ókiline kásipkerlermen esep aıyrysýǵa bir apta ýaqyt berildi. 4 aqpanda qaryz tolyq kólemde óteldi. 

- Másele ótken jyldyń qyrkúıeginen bastap sheshilgen joq. Alaıda, oblystyq prokýratýra organdarymen birlesip jedel jumys istegenderińizdiń arqasynda atqarylǵan jumysqa aqy tóleý máselesi oń sheshimin tapty. Qalyptasqan bereshek tolyq kólemde óteldi, - dedi «Ash stroy» JShS dırektory Ámirjan Shákeı.

Buǵan deıin SQO-da tasqynda zardap shekkenderge úı salǵan kompanııalarǵa 400 mln teńge tólenbegenin jazǵan edik.