SQO-da tasqynnan zardap shekkenderge arnalǵan úıler 100% salynyp bitti
PETROPAVL. KAZINFORM — 15 qyrkúıekte Soltústik Qazaqstan oblysynyń ákimdigi sý tasqynynan zardap shekken barlyq turǵyndardy jańa jáne jóndeýden ótken baspanaǵa ornalastyrdy.
Soltústik Qazaqstanda barlyǵy 1394 úı satyp alynyp, 1899 baspana kúrdeli jóndeýden ótti. Petropavlda 700 úı salynyp, jańa «Birlik» shaǵynaýdany quryldy.
Búgin munda taǵy 173 úıdiń qurylysy aıaqtaldy. Kiltterdi saltanatty túrde tapsyrý rásimine Premer-Mınıstrdiń orynbasary Qanat Bozymbaev qatysty.
«Tózimdilik tanytqan turǵyndarǵa jáne qalpyna keltirýge atsalysqan barlyq bıznes ókilderine alǵys aıtamyn. Olar — „Qazaqstan halqyna“ qorynyń basqarma tóraǵasy Jámishev Bolat Bıdahmetuly, Kazakhmys korporatsııasynyń drektorlar keńesiniń tóraǵasy Ogaı Edýard Vıktorovıch, Kaspi kompanııasy dırektorlar keńesiniń tóraǵasy Kım Vıacheslav Konstantınovıch, KAZ Minerals Management dırektorlar keńesiniń tóraǵasy Oleg Nıkolaevıch Novachýk. Sizder bolmasańyzdar, biz mundaı aýqymdy qurylysty 3,5 aıda bitire almas edik», — dedi Premer-Mınıstrdiń orynbasary.
Búginde jańa «Birlik» shaǵynaýdanynda Kaspi balabaqshanyń qurylysyna demeýshilik etti, 600 oryndyq mektep salý josparlanýda.
Jaqynda yqshamaýdanǵa asfalt tóselip, avtobýs qatynaıtyn bolady.
«Búgin men kópten kútken úıdiń kiltin aldym. Óte qýanyshtymyn. Qıyn boldy. Biraq sońyna deıin shydadyq. Prezıdentke, bizdiń memleketke, ákimdikke jáne qurylysshylarǵa alǵys aıtamyn. Barlyǵy osynda kúndiz-túni jumys istep, úılerdi tez arada turǵyzdy. Men Oıqalada turatynmyn, endi jańa úıde jańa ómir bastap, mal men baqsham bolady», — deıdi Alıma Jamankózova.
«Búkil Qazaqstanǵa kómek pen qoldaý úshin raqmet aıtamyn. Buǵan deıin Zarechnyı kentinde kópbalaly otbasymen 70 sharshy metrlik úıde turǵanbyz. Endi bizdiń keń ári jaryq úıimiz bar. Búgin bárimiz óte qýanyshtymyz», — deıdi «Birlik» shaǵynaýdanynyń turǵyny Dáýren Hamzın.
Aıta ketý kerek, Soltústik Qazaqstan oblysynyń turǵyndarymen birge sý tasqynynan zardap shekken Batys Qazaqstan jáne Qostanaı oblystarynyń turǵyndary jańa jáne jóndeýden ótken úılerine tolyǵymen qonystandy.
