SQO-da tasqynnan zardap shekken eki saýyqtyrý lagerinde maýsym ádettegiden kesh bastalady
PETROPAVL. KAZINFORM – Soltústik Qazaqstan oblysynda bıyl jazǵy saýyqtyrý lagerleriniń basym bóligi 10 maýsymnan bastap oqýshylardy qabyldaı bastaıdy. Demalystyń bul túrimen 6 myńnan astam balany qamtý josparlanǵan.
SQO bilim basqarmasy basshysynyń mindetin atqarýshy Tatıana Protopopova ákimdik otyrysynda balalardyń jazǵy demalysyn uıymdastyrý boıynsha aqparat berdi. Bıyl barlyq oqýshynyń 94,2% nemese 64 myń bala lagerlerde, mektep janyndaǵy alańdarda, jazǵy mektepterde demalady, oblys ortalyǵyna, tarıhı oryndarǵa saıahattar uıymdastyrylady.
Óńirde qazirgi ýaqytta qala syrtynda jumys isteıtin 14 jazǵy saýyqtyrý lageri bar. Bıyl olardyń 11-i balalardy qabyldamaq.
«Qyzyljar aýdanyndaǵy eki saýyqtyrý lageri sý tasqyny kezinde zardap shekti. Solardyń biri – «Orlenok» lagerinde 63 mln teńgege jóndeý júrgiziledi. «Serebrıanyı bor» lageriniń bes ǵımaraty sý astynda qaldy. 1958-1965 jyldary olar qamys-sabannan salynǵan. Qazirgi ýaqytta kelgen shyǵyn eseptelip jatyr. Jalpy bıyl jazǵy lagerlerdi demalys maýsymyna daıyndaýǵa 500 mln astam teńge jumsalady», - deıdi Tatıana Protopopova.
Memlekettik lagerlerge joldamanyń baǵasy 35 myń teńge, al, senimgerlik basqarýǵa berilgen úsh lagerde bir maýsym 55 myń teńge turmaq.
«Turmysy tómen, kópbalaly otbasylardan 2 396 bala tegin demalady. Bıýdjetten 86,5 mln teńge bólindi. Taǵy 1125 bala demeýshilerdiń jáne kásibı odaq esebinen lagerge barady. «Qazaqstan halqyna» qoǵamdyq qorynyń «Jazdyq joldama» jobasy boıynsha aýyldyq jerlerdiń 522 balasy Aqmola oblysyndaǵy eki lagerde tegin demalady. Sondaı-aq «Baldáýrenge», «Bóbek» jáne «Chaıka» balalardyń demalys oryndaryna 400-den astam oqýshy barady. Olardyń ishinde sýdan zardap shekken 1 620 bala da bar», - dedi Tatıana Protopopova.
Buǵan deıin SQO-da bıyl aýyl sharýashylyǵynyń pılottyq sanaǵy qaı eldi mekenderinde ótetinin aıtqan edik.
