SQO-da tasqynnan zaqymdanǵan úılerdiń jartysyna jýyǵy apatty dep tanyldy
PETROPAVL. KAZINFORM – Soltústik Qazaqstan oblysynda tasqyn kezinde zaqymdanǵan úılerdi tehnıkalyq tekserýdiń aldyn ala qorytyndysy shyǵaryldy.
SQO ákimi baspasóz qyzmetiniń málimetinshe, óńir basshysy Ǵaýez Nurmuhambetov búgin Oıqala, Bylǵary, Zarechnoe yqsham aýdandaryndaǵy, Teplıchnoe, Prıbrejnoe aýyldaryndaǵy mehbrıgadalardyń jumysyn kórdi. Qazirgi ýaqytta bul eldi mekenderde zaqymdanǵan úılerdi jóndeý jumystary júrgizilip jatyr. Sapar barysynda zardap shekken turǵyndarmen kezdesip, eldi mekenderge bekitilgen aýdan ákimderi orynbasarlarynyń esebin tyńdady. Óńir basshysy barlyq jumysty sapaly ári ýaqytynda atqarýdy tapsyrdy.
«Búgingi tańda oblystaǵy úılerdi baǵalaý jáne tehnıkalyq zertteýden ótkizý boıynsha barlyq jumys aıaqtalyp, turǵyndarǵa qujattama berilip jatyr. Zaqymdanǵan turǵyn úılerdi tekserýdiń aldyn ala qorytyndysy shyǵaryldy. Soltústik Qazaqstan oblysynda sý tasqyny kezinde 3 898 úı zardap shekti. Saldarynan oblystaǵy 1720 úıdi qalpyna keltirý múmkin emes. Baspanalary apatty dep tanylǵan turǵyndar úshin Solnechnyı-2 shaǵyn aýdanynda 520 úı salynyp jatyr. Barlyǵy 700 úı turǵyzylady. Budan bólek osy kúni 87 páter satyp alyndy. Solnechnyı-2 shaǵyn aýdanyndaǵy jańa baspanaǵa da 130 ótinish qabyldandy», - dedi Ǵaýez Nurmuhambetov.
Oblysta 2178 úı jóndeledi. Qazirgi ýaqytta 270 úı ıesi mehanıkalyq brıgadalardyń kómegimen úılerin jóndeýge kelisti. Bul jumys jalǵasady. Qazir 136 úıde jóndeý-qalpyna keltirý jumystary júrgizilip jatyr. 1055 úı boıynsha zardap shekken turǵyndarǵa óz kúshimen úıdi jóndeýge tólemder jasalmaq.
Buǵan deıin Premer-Mınıstr Oljas Bektenovtiń Prezıdentke sý tasqyny saldaryn joıý jumystary jóninde esep bergenin aıtqan edik.
