SQO-da tasqynnan zaqymdanǵan gıdrotehnıkalyq qurylystar eki aıda qalpyna keltirilmek
PETROPAVL. KAZINFORM – Soltústik Qazaqstan oblysynda kóktemdegi sý tasqynynan zaqymdanǵan gıdrotehnıkalyq qurylystardy qalpyna keltirý jumysy bastaldy. Merdigerlerge bul jumysty eki aı ishinde bitirip, tapsyrý mindeti tur.
SQO ákimi Ǵaýez Nurmuhambetov gıdrotehnıkalyq qurylystarda qalpyna keltirý jumystarynyń bastalǵanyn áleýmettik jelidegi paraqshasynda jazdy. https://www.facebook.com/gaueznurmukhambetov Kóktemgi sý tasqyny kezinde bul nysandar qatty aǵysqa shydas bermeı, buzylǵan edi. Óńir basshysynyń aıtýynsha, atqarylatyn jumystar boıynsha jol kartasy qabyldanyp, qarjy bólindi, merdigerler anyqtaldy.
«Jumys Petropavldaǵy Bylǵary jáne Zarechnyı kentindegi, Ýşev kóshesiniń boıyndaǵy jáne Oıqaladaǵy 0,8 shaqyrymdyq bógetterde júrgiziledi. Dál osyndaı jumystarmen Qyzyljar aýdanyndaǵy Prıbrejnoe, Beskól jáne Teplıchnoe aýyldary qamtylady. Sondaı-aq bıotoǵannyń aınalasyndaǵy bóget bekitilip, Jeńis saıabaǵynda ashyq nóserlik káriz júıesi ornatylyp, jaǵalaýdy nyǵaıtý jumystary júrgizilmek. Bógetterdi nyǵaıtý jáne bıiktetý jumystary qatań túrde mamandardyń esepteýleri boıynsha júrgizilip jatyr. Olar Esil ózenindegi sýdyń maksımaldy deńgeıin esepke aldy. Bıylǵy qatty sý tasqynynyń barlyq erekshelikteri eskerildi. Búkil jumystardy eki aıda aıaqtaý josparlanǵan. Qorǵanys qurylymdaryn qalpyna keltirý jeke baqylaýymda bolady», - dep jazdy Ǵaýez Nurmuhambetov.
Esterińizge salaıyq, «Birlik» shaǵyn aýdanynda tasqynnan zardap shekkenderge arnalyp salynǵan úılerdiń sońǵy legi 15 qyrkúıekte saltanatty túrde paıdalanýǵa berildi. Shamamen bes aıdyń ishinde jazyq dalada 700 úıi bar eldi meken paıda boldy.
