SQO-da tasqynnan zardap shekken kásipkerlerdiń shyǵyny ótele bastady
PETROPAVL. KAZINFORM – Soltústik Qazaqstan oblysynda tasqynnan zardap shekken kásipkerler ótemaqy ala bastady. Komıssııa jalpy somasy 900 mln teńge bolatyn 41 ótinimdi maquldady.
Respýblıkalyq bıýdjetten alǵashqy transh óńirge jetti. Bul týraly shaǵyn jáne orta bıznes sýbektilerine keltirilgen múliktik shyǵyndardyń ornyn toltyrý jónindegi óńirlik komıssııanyń múshesi, SQO kásipkerler palatasynyń dırektory Esjan Orazalın málimdedi.
SQO-da sý tasqyny saldarynan 140 kásipker zardap shekti. Bul aımaqtyq komıssııaǵa zııandy óteý týraly ótinish bildirgen nemese ótinish bildirgisi keletinderdiń sany. Komıssııa jumysy bastalǵannan beri 10 otyrys ótken.
«Búgingi tańda biz 2 mlrd teńgeden astam somaǵa 99 ótinimdi qaradyq, onyń ishinde 900 mln teńgege jýyq somaǵa zalaldy óteýge 41 ótinimdi maquldadyq. Qalǵandarynyń qujattary tolyq bolmaýyna baılanysty komıssııa qaıtardy. Sondaı-aq basqa komıssııa sheshim qabyldaýy tıis aýyl sharýashylyǵy sýbektilerinen ótinimder tústi. 23 shildede bizdiń óńir kásipkerlerden túsken toǵyz ótinish boıynsha ótemaqy tóleýge 90 mln teńge kóleminde alǵashqy transh aldy. Aqsha zardap shekkenderdiń shottaryna aýdaryldy», - dedi Esjan Orazalın.
SQO kásipkerler palatasy dırektorynyń aıtýynsha, ótemaqy alý úshin tıisti qujattardy komıssııa qaraýyna tolyq ótkizý kerek. Tek sodan keıin ǵana respýblıkalyq bıýdjetten qarajat bólinbek.
«Kásipkerler palatasynyń qyzmetkerleri óńirlik komıssııaǵa áli de júginbegen kásipkerlerge telefon soǵyp, tıisti usynystar men túsiniktemeler berdi. Kásipkerlerden ótinish berýdi jedeldetýdi suraımyz», - deıdi Esjan Orazalın.
Buǵan deıin SQO-da tasqynnan zardap shekken otbasylardyń balalary mektepte ystyq tamaqpen tegin qamtylatyndyǵyn jazǵan edik.
