SQO-da tasqyn sý men muz 700-den astam elektr baǵanyn qulatqan
PETROPAVL. KAZINFORM – «Ortalyq-Azııa Elektroenergetıkalyq Korporatsııasy» AQ kompanııalar toby sý tasqyny saldaryn joıýǵa 2,4 mlrd teńgeden astam qarajat bóledi.
Bul týraly «Sevkazenergo» AQ baspasóz qyzmeti málim etti.
«OAEK» kompanııalar tobyna qaraıtyn elektrenergetıkalyq ınfraqurylym nysandarynda «Sevkazenergo» AQ, «Pavlodarenergo» AQ, «Aqmola elektr jelisin taratý kompanııasy» AQ qyzmetkerleri táýlik boıy avarııalyq-qalpyna keltirý jumystaryn júrgizip jatyr.
Kóktemgi sý tasqyny kezinde tek Soltústik Qazaqstan oblysynda ǵana elektr berý jelileriniń 729 baǵany jáne eki qosalqy stantsııaǵa zaqym keltirildi, 98 km elektr jelisin qalpyna keltirý qajet.
Mamandardyń aıtýynsha, kelgen shyǵyn budan da kóp bolýy múmkin, ol sý ketkennen keıin belgili bolmaq.
SQO Shal aqyn aýdanynda 10kV jeliniń qurylysy aıaqtalyp, iske qosyldy. Nátıjesinde Keńes, Jańatalap jáne Jańajol aýyldarynyń 200-den astam turǵyny turaqty elektr energııasymen qamtamasyz etildi. Jańadan jeli salynyp jatqan ýaqytta eldi mekenderge elektr qýaty dızeldi generatorlardan berildi.
«Qyzyljar Sý» JShS ýaqytsha sorǵy stantsııasyn elektrmen jabdyqtaý úshin 60 qyzmetker, 13 arnaıy tehnıka jumyldyryldy. 21 sáýirge qaraǵan túni ekinshi sorǵy stantsııasy elektrmen jabdyqtaldy.
Qyzyljar aýdanynda Voznesenka, Nadejka jáne Bogolıýbovo eldi mekenderiniń turǵyndaryn elektr energııasymen qamtamasyz etý úshin temirbeton tirekter ornatyldy. Búginde uzyndyǵy 15,6 shaqyrym bolatyn «Ledenovo-Bogolıýbovo» 10kV joǵary voltty jelisi iske qosyldy.
Sý basqan aýdandardy elektrmen qamtý úshin «Sevkazenergo» AQ qosymsha 5 dızeldi-generatorlyq qondyrǵy satyp aldy. Olar Novokamenka jáne Arhangelka aýyldarynda ornatylǵan.
Al Aqmola oblysynda elektr taratý jelileriniń 212 baǵany men bir qosalqy stantsııa isten shyqty. Sondaı-aq 39 km elektr jelisin qalpyna keltirý qajet.
Buǵan deıin Petropavlda sý tasqynynan zardap shekkender qandaı somaǵa baspana ala alatyndyǵyn aıtqan edik.
