SQO-da tasqyn sý bastalǵaly 4,8 mln tekshe metr sý sorǵyzyldy

PETROPAVL. KAZINFORM – Soltústik Qazaqstan oblysynda sý basqan úıler qalǵan joq. Bul týraly QR Tótenshe jaǵdaılar mınıstrligi málimdedi. 

TJM málimetinshe, qutqarýshylardyń úılesimdi kúsh-jigeriniń nátıjesinde Soltústik Qazaqstan oblysyndaǵy sý basqan úıler tolyqtaı sýdan aryldy. 

Búgingi tańda óńirde 29 aýla aýmaǵy sý astynda qalyp otyr.

Sý tasqyny bastalǵannan beri aımaqta 4,8 mln. tekshe metrden astam erigen sý soryldy.

Sondaı-aq, QR TJM 528859 áskerı bólimi eldi mekenderdi sanıtarlyq óńdeý boıynsha jumystar júrgizip jatyr. 

Buǵan deıin habarlaǵanmyzdaı, Soltústik Qazaqstan oblysy Qyzyljar aýdanynda turǵyndar sý tasqyny kezinde ólgen maly úshin ótemaqy alyp jatyr.  

Petropavlda sý astynda qalǵan 2156 úıdiń jartysynan astamy tehnıkalyq tekseristen ótti. Ázirge 537-siniń ǵana qorytyndysy daıyn, 238 baspana apatty dep tanyldy.

Sý basqan Qyzyljar aýdany turǵyndaryna 540 mln teńge birjolǵy tólem jasaldy.