SQO-da tasqyn kezinde zaqymdanǵan 700 elektr baǵanynyń ár úshinshisi qalpyna keltirildi
PETROPAVL. KAZINFORM – Petropavldaǵy 2-jylý elektr ortalyǵynda jylytý maýsymyna daıyndyq boıynsha kóshpeli keńes ótti. «Sevkazenergo» AQ kásiporyndary josparmen bólisip, atqarylǵan jumys boıynsha esep berdi.
Іs-sharaǵa Soltústik Qazaqstan oblysynyń ákimi Ǵaýez Nurmuhambetov te qatysty. Bul jaıynda óńir basshysy áleýmettik jelidegi paraqshasynda jazdy.
«Bıyl «Sevkazenergo» AQ JEO-2 jóndeý jumystaryna 17,6 mlrd teńge bóldi. Qazir bir qazandyq pen eki týrboagregatqa kúrdeli jóndeý júrgizilip jatyr. Sondaı-aq bir qazandyq pen bir týrboagregat qaıta jańǵyrtylý ústinde. Murjaǵa tekserý júrgiziledi. Aldaǵy jylytý maýsymynda oblys ortalyǵy 2 murja arqyly jylýmen qamtamasyz etilmek. Sonymen qatar, jańa murjanyń qurylysy da júrgizilip jatyr», - dedi Ǵaýez Nurmuhambetov.
Kóshpeli otyrys barysynda óńirdi elektr qýatymen qamtýshy kompanııa – «Soltústik Qazaqstan elektrjelistik taratý kompanııasy» AQ jospary da tyńdardy.
«Kompanııa 401 shaqyrym elektr jelisin jáne 18 qosalqy stantsııany jóndeý jáne qaıta qurýdy josparlap otyr. Sý tasqyny kezinde 700-den astam elektr baǵanasy zaqymdanǵan. Búgingi tańda 200-den astam baǵana qalpyna keltirildi. Sonymen qatar, jaǵdaı qaıtalanbaýy úshin tasqynynyń erekshelikteri eskerilip, beriktigi joǵary metall baǵandary ornatylyp jatyr.
Investıtsııalyq baǵdarlamalaryn júzege asyrýmen qatar, kompanııa ákimdikpen birlesip ınfraqurylymdy damytýǵa, sonyń ishinde aýyldardaǵy tozyǵy jetken elektr jelilerin jańartýǵa nesıelik qarajat tartýdy josparlap otyr.
«Petropavl jylý jelileri» JShS 6,4 shaqyrym magıstraldyq jáne taratý jelilerin jóndep, qaıta qalpyna keltiredi. Sondaı-aq, Petropavldaǵy Sátpaev kóshesindegi jylý magıstraliniń qurylysy aıaqtalady, Rýjeınıkov kóshesindegi jylý magıstralin jańǵyrtý bastaldy», - dep jazdy óńir basshysy.
Jıyn qorytyndysy boıynsha SQO ákimi jaýapty memlekettik organdarǵa qurylys-jóndeý jumystarynyń barysyn qatań baqylaýǵa alýdy, aldaǵy jylý berý maýsymynyń úzdiksiz ótýine tolyq ázirlikti qamtamasyz etýdi tapsyrdy.
Buǵan deıin tasqyn kezinde eldegi sý qoımalaryna 12 mlrd tekshe metrden astam sý jınalǵandyǵyn aıtqan edik.
