SQO-da tasqyn kezinde sýda qalǵan kolonııada jóndeý jumysy aıaqtaldy
PETROPAVL. KAZINFORM – Soltústik Qazaqstan oblysy boıynsha qylmystyq-atqarý departamentiniń №48 mekemesinde sý tasqynynyń saldaryn joıý boıynsha qalpyna keltirý jumystary aıaqtaldy.
№48 mekeme Petropavldaǵy Zarechnyı kentinde ornalasqan. Kóktemgi tasqyn kezinde kolonııany kórshi óńirlerge kóshirýge týra keldi.
«Mekemege úlken zaqym keldi, aýmaǵy tolyq sýǵa ketip, tereze deńgeıine deıin kóterildi. Sondyqtan sottalǵandardy 5 aıǵa Pavlodar jáne Qaraǵandy mekemelerine ýaqytsha kóshirýge týra keldi. Sý ketkennen keıin jazasyn óteýshiler etappen qaıtarylyp, qyzmetkerler men sottalǵandar jóndeý jumysyna kiristi. Eden jańadan tóseldi. Ǵımarattar keptirilip, qabyrǵalary qalpyna keltirildi, terezeler ishinara aýystyrylyp, tolyq kosmetıkalyq jóndeý júrgizildi. Jańa jıhaz alyndy», - deıdi mekeme bastyǵynyń orynbasary Áset Qusaıyn.
Mekeme jumysy qalpyna kelgennen keıin sottalǵandarǵa týystarymen uzaq kezdesýge ruqsat berildi. Olardyń alǵashqy toǵyzy otbasylarymen qaýyshty.
«Jeti aıǵa jýyq ýaqyttan keıin men ulymmen uzaq kezdesýge keldim. Jóndeý jumystary júrgizilgenin kórdik, barlyǵy derlik jańa, jaıly bólmeler, sottalǵandar salǵan sýrettermen bezendirilgen. Aldaǵy eki kún balamnyń janynda bolatynyma qýanyshtymyn», - deıdi A. esimdi sottalǵannyń anasy.
Sottalǵandarǵa týystarymen kezdesýge 15 jeke jatyn bólme, as úı, jýynatyn bólme, demalys bólmesi jáne balalarǵa arnalǵan oıyn alańy jabdyqtaldy.
Mamandardyń aıtýynsha, QR qylmystyq-atqarý kodeksiniń 106-babyna sáıkes jazasyn óteýshilerge uzaqtyǵy eki saǵat qysqa merzimdi jáne mekeme aýmaǵynda uzaqtyǵy eki táýlik bolatyn uzaq merzimdi kezdesýler beriledi.
Buǵan deıin SQO-da tasqynnan zardap shekkenderge arnalǵan úıler 100% salynyp bitkenin jazǵan edik.
