SQO-da tasqyn kezinde kvadrotsıklmen qap tasyǵan balanyń ata-anasyna aıyppul salyndy

PETROPAVL. KAZINFORM – Soltústik Qazaqstan oblysyndaǵy Teplıchnoe eldi mekenin sý tasqynynan qorǵaýǵa kómektesken 10 jastaǵy Dastan Myrzabaıdyń ata-anasy ákimshilik  jaýapkershilikke tartyldy.

Dastan osyndan 3-4 kún buryn jeliniń «juldyzyna» aınalǵan edi. Jasóspirim kvadrotsıklge minip, sý tasqynymen kúresip jatqandarǵa kóligimen aýyr qaptardy tasyp kómektesti. 

Birer kún buryn balanyń ata-anasyna polıtsııa 50 AEK – 196 600 teńge aıyppul saldy.

- 26 sáýirde SQO Teplıchnoe aýylynda bógetti nyǵaıtý jumystaryn júrgizý barysynda aýdannyń 34 jastaǵy turǵyny óziniń 10 jasar ulyn kvadrotsıkldi basqarýǵa jiberdi. Osy fakti boıynsha ol QR Ákimshilik quqyq buzýshylyq týraly Kodeksiniń 612- babynyń 5-bóligi boıynsha - kólik quralyn basqarýdy oǵan quqyǵy joq adamǵa bergeni úshin ákimshilik jaýapkershilikke tartyldy. Polıtsııa zańnamany saqtaý qajettigine nazar aýdarady. Balalardyń jáne sý tasqyny saldaryn joıýǵa qatysýshylardyń qaýipsizdigi – basymdyqqa ıe. Kómekteskenderdiń barlyǵyna alǵys aıtamyz jáne kez kelgen jumysty oryndaý kezinde saqtyq sharalaryn saqtaýǵa shaqyramyz, - dep jaýap berdi SQO Polıtsııa departamenti baspasóz qyzmetindegiler.

Buǵan deıin SQO-da sý tasqynyna qarsy kúsheıtilgen is-sharalar jalǵasyp jatqanyn jazǵan edik.