SQO-da tasqyn qaýpin boljaý úshin qar jamylǵysynyń kórsetkishteri ólshenip jatyr
PETROPAVL. KAZINFORM — Soltústik Qazaqstan oblysynda mamandar qar jamylǵysynyń bıiktigin, tyǵyzdyǵyn jáne qardaǵy sý qoryn baǵalap jatyr.
«Qazgıdromet» kásiporny SQO fılıalynyń málimetinshe, oblys aýmaǵynda uzyndyǵy 1000 metrden 2000 metrge deıingi 31 dalalyq qar ólsheý marshrýty jumys isteıdi. Osy boıynsha kóktemgi sý tasqynynyń qalyptasýyna tikeleı áser etetin qar jamylǵysynyń negizgi parametrleri anyqtalady.
Sonymen qatar, 2018 jyldan beri «Qazgıdromet» kásiporny fılıalynyń mamandary SQO Tótenshe jaǵdaılar departamentimen birlesip, qar jamylǵysyndaǵy esepke alynbaǵan ylǵal qorlaryn anyqtaý maqsatynda saılar, jyralar jáne ózen arnalary boıymen marshrýttyq qar ólsheý tekserýlerin júrgizip keledi. Bıyl mamandar bul jumysty 30 qańtarǵa deıin atqarmaq.
Aldyn ala taldaý nátıjesinde Esil aýdany, Ǵabıt Músirepov atyndaǵy aýdan jáne Aıyrtaý aýdany aýmaǵynda ornalasqan Esil ózeniniń sý jınalý alabynda jeti baqylaý orny tańdap alyndy. Qazir zertteý onyń ekeýinde aıaqtaldy.
Máselen, Esil aýdanyndaǵy Maltsevo saıynda qar jamylǵysyndaǵy sý qory 52 mm boldy. Bul — 2025 jylmen salystyrǵanda 33%, al 2024 jylmen salystyrǵanda 47% tómen.
Ǵabıt Músirepov atyndaǵy aýdan aýmaǵyndaǵy Muqyr ózeninde qardaǵy sý qory 26 mm boldy. Bul 2025 jylǵy deńgeıge sáıkes, alaıda 2024 jylmen salystyrǵanda 55% az.
Jınalǵan derekter SQO-daǵy gıdrologııalyq jaǵdaıdy baǵalaý, sondaı-aq kóktemgi sý tasqyny qaýpin aldyn ala boljaý úshin qoldanylady.
Buǵan deıin elimizdiń birqatar óńirinde sý basý qaýpin azaıtý jáne halyqtyń qaýipsizdigin qamtamasyz etý maqsatynda sý tasqynyna qarsy is-sharalar jalǵasyp jatqanyn jazǵan edik.