SQO-da tártiptik jaza qoldanylǵan 14 memqyzmetshiniń quqyǵy qorǵaldy

PETROPAVL. KAZINFORM – Soltústik Qazastan oblysynda keı memlekettik qyzmetshilerge tártiptik jaza negizsiz qoldanylǵan. 

QR Memlekettik qyzmet isteri agenttiginiń SQO boıynsha departamentiniń memlekettik qyzmet salasyndaǵy baqylaý basqarmasynyń bas mamany Darhan Ermekovtyń aıtýynsha, turaqty negizde memlekettik ákimshilik qyzmetshilerge tártiptik jaza qoldanýǵa qatysty taldaý júrgiziledi.

«Toqsan saıynǵy materıaldardy taldaý barysynda personaldy basqarý qyzmetteri mamandarynyń qyzmettik tergep-tekserý júrgizý jáne tártiptik jaza qoldaný kezinde tıisti rásimderdi buzý faktilerin anyqtaımyz.

Osylaısha bıylǵy 8 aı ishinde júrgizilgen taldaý qorytyndysy boıynsha tártiptik jaza qoldaný týraly 14 aktiniń kúshi joıyldy.

Tımırıazev, Aqjar, Jambyl, Esil, Aıyrtaý aýdandarynda, Ǵ.Músirepov atyndaǵy aýdanda jáne Petropavl qalasynda 14 memlekettik qyzmetshiniń quqyqtary qalpyna keltirildi», - deıdi Darhan Ermekov.

Tártiptik jazany zańsyz qoldaný memlekettik qyzmetshiniń quqyǵyn buzady. Óıtkeni jazalanǵan maman basshylyq tarapynan birqatar jeńildikten, sonyń ishinde syıaqydan aıyrylady.

«Personaldy basqarý qyzmetteri mamandary jıi jol beretin zań buzýshylyqtardyń biri - tártiptik jaza qoldaný merzimin buzý. Sondaı-aq, jazbasha túsiniktemeni talap etpeý, tártiptik teris qylyq materıaldaryn sapasyz jáne birjaqty qaraý, sondaı-aq, qyzmettik tergep-tekserý júrgizý jáne tártiptik jaza qoldaný týraly aktini rásimdeý kezinde olqylyqtar jiberiledi.

Memlekettik qyzmetshilerge qatysty tártiptik jaza qoldaný rásimderin saqtap, olardyń quqyǵynyń buzylýyna jol bermeý maqsatynda tártiptik jaza qoldaný erejeleri saqtalýy kerek», - deıdi departamenttiń bas mamany.

Al zańsyz tártiptik jaýapkershilikke tartýǵa baılanysty máseleler týyndaǵan jaǵdaıda, memlekettik qyzmetshiler QR Memlekettik qyzmet isteri agenttiginiń jergilikti departamentine júgine alady.

Buǵan deıin SQO-da tehnıkalyq qadaǵalaý sarapshylary jol jumysyn qaǵaz júzinde baqylap kelgenin jazǵan edik.