SQO-da tamyzda moıyl qaıta gúldep jatyr
PETROPAVL. QazAqparat – Soltústik Qazaqstan oblysynda kúzdiń jaqyndaǵanyna qaramastan moıyl aǵashy qaıta gúldep jatyr, dep habarlaıdy Qazaqparat tilshisi.
SQO Qyzyljar aýdanyndaǵy Beskól aýylynyń turǵyndary baqshalaryndaǵy moıyl aǵashynyń qaıta gúldeı bastaǵanyn kórip, bul jańalyqpen Instagram -da bólisti.
Turǵyndardyń aıtýynsha, olar mundaı qubylysty alǵash ret baıqap otyr. Óıtkeni ádette moıyl kóktemde mamyr aıynyń ortasynan asa ǵana gúldeıdi. Osy kezde mindetti túrde kún sýytady eken.
M.Qozybaev atyndaǵy SQÝ-diń bıologııa kafedrasynyń dotsenti Gúlnar Tileýbergenovanyń aıtýynsha, moıyl aǵashynyń tamyz aıynda gúldeýi – anomalııalyq qubylys. Alaıda sırek bolsa da tabıǵatta kezdesedi eken.
«Bıyl jaz óte ystyq boldy. Moıyldyń qaıta gúldeýine osy sebep bolýy múmkin. Ósimdik úshin bul qaýipti. Óıtkeni qazir ol ekinshi ret gúldeý úshin kóp energııa jumsady. Jemisi de jetilip úlgermeıdi. Kóktemde bul aǵashtar endi gúldemeıdi. Jalpy bul qubylys eski aǵashtarǵa tán. Olar osylaı sońǵy ret gúldep, qystan aman shyqpaıdy, qýrap qalady», - deıdi Gúlnar Tileýbergenova.
