SQO-da talapty oryndamaǵan 7 kásipker jalǵa alǵan kóldi qaıtaryp berdi
PETROPAVL. QazAqparat - Soltústik Qazaqstan oblysynda eki myńnan astam kól bolsa, sonyń 322-si búgingi kúni jalǵa berilgen, dep habarlaıdy QazAqparat tilshisi.
SQO-da 2 myńnan asa kól bar. Onyń 491-i balyq sharýashylyǵyn damytýǵa qolaıly. 322 kól 146 kásipkerge jalǵa berilse, qalǵany qor retinde saqtaýly.
Esil aýdanyndaǵy Kindikti kóliniń jalǵa berilgenine bıyl 20 jyl. 200 ga aýmaqty alyp jatqan sý qoımasynyń tereńdigi 5 metrge deıin jetedi eken. Qazir munda balyqtyń 15 túri kezdesedi. Bul - jergilikti kásipker Vıacheslav Smırnovtyń eńbeginiń arqasy.
«Kóldi jalǵa alǵan kezde balyqtyń 3-aq túri bolatyn. Alaıda, bul kólmen jolym boldy. Balyq ósirýge yńǵaıly. Qysy-jazy aýlaımyz. Jylyna 18 tonnaǵa deıin ónim alamyz. Alaıda, munyń bári mańdaı terdiń nátıjesi. Qazir kólge jiberetin shabaqtardy ózim ósiremin. Inkýbatsııalyq tsehym jumys isteıdi», - deıdi kásipker Vıacheslav Smırnov.
Tabıǵı resýrstar jáne tabıǵat paıdalanýdy retteý basqarmasy mamandarynyń aıtýynsha, tabıǵatty paıdalanýshylarmen mindetti túrde kelisimshart jasalady. Alaıda kóldi jalǵa alýshylardyń barlyǵy birdeı talaptardy oryndaı bermeıdi eken.
«Tabıǵat paıdalanýshy balyq sharýashylyǵyn damytý jaıynda jospar quryp, sol boıynsha esep berip otyrýy kerek. Talaptyń biri - jyl saıyn sý qoımalaryn balyqtandyrý, sondaı-aq sý qoımalaryn qorǵaýǵa, materıaldyq-tehnıkalyq bazany jaqsartýǵa belgili bir qarjy salýlary qajet. Muny oryndamaǵan jaǵdaıda biz birjaqty tártippen kelisimdi buza alamyz», - deıdi SQO Tabıǵı resýrstar jáne tabıǵat paıdalanýdy retteý basqarmasy Janýarlar dúnıesi jáne balyq resýrstary bólimi jetekshisiniń m.a. Mıhaıl Nıkıtın.
Mamandardyń aıtýynsha, byltyr jalǵa alýshylardyń bireýi óz erkimen kólden bas tartqan. Bıyl jyl basynan talapty oryndamaǵan 7 kásipkermen kelisimshart buzyldy.
