SQO-da talapty buzǵan 12 mektep túlegi UBT-dan shyǵaryldy
PETROPAVL. QazAqparat – Soltústik Qazaqstan oblysynda Ulttyq biryńǵaı testileýdiń alǵashqy kezeńine myńnan astam túlek qatyssa, sonyń 12-si ózderimen birge synaqqa ruqsat etilmegen zat kirgizgeni úshin zaldan shyǵaryldy, dep habarlaıdy QazAqparat tilshisi.
SQO-da Ulttyq biryńǵaı testileýdiń birinshi kezeńi 17-19 qańtar aralyǵynda ótti. Buǵan deıin habarlaǵanymyzdaı, testileýge qatysýǵa 1409 adam tilek bildirgen edi.
SQO Sybaılas jemqorlyqqa qarsy qyzmettiń málimetinshe, óńirde bıyl 3276 túlek mektep bitirse, olardyń 2080-ni, ıaǵnı 63% UBT-ǵa qatysýǵa ótinish bergen.
UBT-nyń birinshi kezeńi oblysta 5 jerde: M.Qozybaev atyndaǵy SQMÝ-de, Aqjar aýdanynyń Talshyq eldi mekeninde, Jambyl aýdanynyń ortalyǵy Presnovkada, Ǵ.Músirepov aýdanynyń Novoıshımka eldi mekeni men Aıyrtaý aýdanynyń ortalyǵy Saýmalkólde ótti.
Synaq talapqa saı ótýi úshin QR Bilim jáne ǵylym mınıstrliginiń buıryǵyna sáıkes «Qyzyljar-adaldyq alańy» jobalyq keńsesiniń jáne sybaılas jemqorlyqqa qarsy vedomstvonyń qyzmetkerleri, arnaıy monıtorıngtik toptyń músheleri baqylady.
«UBT tapsyrý kezinde talapty buzǵan 12 adam zaldan shyǵaryldy. Aýyryp qalýyna baılanysty 4 adam testileýden ótpedi. UBT-dan negizinen smartfondardy qoldanǵandary úshin shyǵaryldy. Test tapsyrý oryndarynda beınekameralar jumys istedi», - deıdi QR Sybaılas jemqorlyqqa qarsy is-qımyl agenttigi SQO boıynsha departamentiniń qyzmetkerleri.
UBT ádil ótýi úshin zaldar beınekameralarmen jabdyqtalǵan. Sol sebepti Sybaılas jemqorlyqqa qarsy qyzmet mamandary túlekterdi test tapsyrý úshin uıaly telefon, shpargalka kirgizýdiń bos áýreshilik ekenin eskertedi.
