SQO-da taksıst jigit áleýmettik fılm túsirip, qaıyrymdylyqpen aınalysady
PETROPAVL. KAZINFORM – Soltústik Qazaqstan oblysynyń turǵyny Damır Makımkenov oblys jurtshylyǵyna jaqsy tanys. Qarapaıym jigit qoǵamdaǵy ózekti taqyryptardy qozǵap, óz qarajatyna on shaqty qysqametrajdy fılm túsirdi.
Qyzyljar aýdanynyń turǵyny qazir orda buzar otyz jasta. Anasymen Báıterek aýylynda turyp jatyr.
- Damır, qazir qaıdasyz, nemen aınalysyp júrsiz? Kórinbeı kettińiz…
- Qazir kóbine taksıdemin. Oblys ishinde ǵana emes, alys saparlarǵa da shyǵamyn. Jolda júrgen unaıdy. Ári taksı júrgizý meniń tabys kózim.
- Birneshe qysqa metrajdy áleýmettik kórkem fılm túsirgenińizdi bilemiz. Bul baǵytty tastap ketken joqsyz ba?
- Joq, kıno túsirý, shyǵarmashylyqpen aınalysý – meniń súıikti isim. Osy kúnge deıin 6-7 fılm jaryqqa shyqty. Stsenarııin jazatyn ózim, rejısseri de ózim. Qazir oblystyq polıtsııa departamentimen ortaq áleýmettik jobany iske asyrýdy josparlap otyrmyz. Bir-eki aptada túsirilimge kirisemiz. Birinshisi joldaǵy qaýipsizdikke baılanysty, ekinshisi nashaqorlyq jaıynda bolmaq.
- Qatelespesem, joldaǵy qaýipsizdikke baılanysty buǵan deıin de fılm túsirdińiz ǵoı?
- Sizdiń aıtyp otyrǵanyńyz mas kúıde kólik júrgizip, saldarynan adamdy qaǵyp ketip, óltirip alǵan jigittiń oqıǵasyn baıandaıtyn «Delo №315» fılmi. Mundaǵy basty messedj – jol-kólik apaty zardap shegýshiniń ǵana emes, qylmyskerdiń de otbasy, týǵan-týystary úshin úlken qaıǵy ekenin kórsetý. Rólge mas kúıde otyrmas buryn, júrgizýshiler onyń saldary nege ákeletinin esten shyǵarmaǵany jón. Meniń fılmimde balalar jaýapsyz júrgizýshiniń kesirinen ákesiz qaldy. Al mas júrgizýshi bireýdiń jalǵyz balasy. Ol da óz ómirin ǵana qor qylyp qoımaı, ata-anasynyń úkilegen úmitin joq etti.
- Kıno túsirýge qalaı kelip júrsiz, neden bastaldy?
- Qazaqstandyq fılmderdi jıi kóremin. Kóbine Almatyda, Tarazda, Shymkentte túsiriledi. Birde nege bizdiń Petropavlda fılm túsirmeıdi, biz kimnen kembiz degen oı keldi. Ol kezde 23 jastamyn, ambıtsııa uryp tur. Kóp oılanbastan fılmniń stsenarııin jazýǵa otyrdym. Mektepte basqa sabaqtardan ortasha bolsam da, shyǵarma jazý unaıtyn. Sondyqtan qıyn bolǵan joq.
Al oıymdy júzege asyrýda birqatar másele týyndaǵany ras. Bizdiń óńirde mundaı jobalarǵa demeýshi tabý qıyn, múlde joq. Sondyqtan taksıletip tapqan qolymda bar 300-400 teńgemen 2020 jyly «Dedýshka» dep atalatyn alǵashqy qysqa metrajdy kórkem fılm jaryqqa shyqty. Bul týyndyda da ózekti másele – áke men bala qarym-qatynasy kórsetiledi. Kórgender tarapynan joǵary baǵa alyp, bul maǵan qanat bitirgendeı boldy.
- Kóktemgi tasqyn kezinde de qarap otyrǵan joqsyz. Kópshiliktiń arasynan tabyldyńyz.
- Ár nárseniń oń jáne kemshin tusy bar ǵoı. Byltyrǵy sý tasqyny bizdi biriktirdi, qıyn-qystaý kezde «bir jeńnen qol, bir jaǵadan bas» shyǵara alatynymyzdy kórsetti. Men de bastapqyda SQO Qazaqstan halqy Assambleıasynda volonter boldym. Keıin qoıma ashyp, kelgen gýmanıtarlyq kómekti tarattym. Esebim boıynsha, 3 myńǵa jýyq adamǵa kómek berdik. Azyq-túlik berdik, turmysqa kúndelikti qajet taýarlardy tarattyq.
- «Maskadaǵy adam» qorynyń ókili bolǵan ekensiz. Oblysta neshe adamǵa kómek kórsetildi?
- «Maskadaǵy adam» qorynyń áleýmettik jelidegi paraqshasyna burynnan jazylǵanmyn. Olardyń tasqynnan zardap shekkenderge baspana alýǵa kómektesetinin estigennen keıin habarlastym. Qor ókilderi maǵan úıleri sýǵa ketken birneshe otbasyny tabýǵa kómektesýdi surady. Qoldarynda qujaty joq, ıaǵnı memleketten kómek berilerde qıyndyq týýy múmkin alty otbasyny tańdap aldyq. Olarǵa quny 12-15 mln teńge turatyn páterler satyp alyndy.
Qor ókilderimen baılanystamyn. Jaqynda Shal aqyn aýdany Stýpınka eldi mekeninde órtte otbasynan aırylǵan 16 jasar Stanıslavqa kómek kórsetildi. «Maskadaǵy adam» jasóspirimge Astanadan páter satyp alyp, syılady. Budan bólek kózin emdetedi. Oqyp, mamandyq ıesi bolýyna járdemdesedi.
- Medkolledjge túsip, odan kettińiz, quqyq qorǵaý organdarynda da istedińiz, kıno túsirdińiz, taksı júrgizdińiz, endi qaıyrymdylyqpen aınalysyp júrsiz. Búginde janyńyzǵa jaqyn isti taptyńyz ba?
- Kóńiliń jatpasa ol isten nátıje kórý, belgili bir jetistikke jetý múmkin emes. Sol sebepti qazir ózime unaıtyn jumyspen aınalysyp jatyrmyn. Alda ne bolaryn bolashaq kórsetedi. Biraq men tolyq metrajdy fılm túsirý armanymnan bas tartqan joqpyn.