SQO-da taksı júrgizýshileri kólikterine qara lenta taǵyp júr
PETROPAVL. KAZINFORM — Petropavlda taksı júrgizýshisi men jolaýshy arasynda janjal týyndap, saldarynan júrgizýshi birer kúnnen keıin alǵan jaraqatynan kóz jumdy.
Jergilikti taksı júrgizýshileriniń aıtýynsha, 60 jastaǵy kólik júrgizýshisi Petropavldaǵy Oıqala shaǵyn aýdanynan birneshe adamdy mingizgen. Keıin jolaýshylardyń biri salonda temeki shekpek bolǵan. Taksıst shylym tartýǵa bolmaıtynyn eskertken. Arty janjalǵa ulasqan. Soqqydan kólik júrgizýshisi asfaltqa basymen qulap, birneshe kúnnen keıin aýrýhanada qaıtys boldy.
Soltústik Qazaqstan oblystyq polıtsııa departamenti baspasóz qyzmetiniń málimetinshe, polıtseıler 60 jastaǵy taksı júrgizýshisine aýyr dene jaraqatyn keltirdi degen kúdikpen bir azamatty ustady. Qazirgi ýaqytta osy oqıǵa boıynsha barlyq qajetti tergeý amaldary júrgizilip jatyr. Tergeýshiler qylmystyń barlyq mán-jaıyn, sebep saldaryn jan-jaqty zerttep jatyr.
Al áriptesteriniń qaıtys bolýyna baılanysty óńirdiń taksı júrgizýshileri 14 maýsymnan bastap aza tutyp jatyr. Bir apta boıy olar kólikterine qara lenta taǵyp júredi.
Buǵan deıin Petropavlda jumysshy JEO-2 aýmaǵynda joǵarydan qulap ketkenin jazǵan edik.