SQO-da taǵy 3 aýylda karantındik shekteý kúsheıtildi
PETROPAVL. QazAqparat – Soltústik Qazaqstan oblysynda koronavırýsty juqtyrýshylardyń artýyna baılanysty taǵy úsh aýylda karantındik shekteýler kúsheıtildi, dep habarlaıdy QazAqparat tilshisi.
SQO Taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetinshe, búginde Býlaevo, Mamlıýtka qalalary jáne ıAvlenka eldi mekeninen basqa taǵy 3 aýylda karantın kúsheıtildi.
«Petropavldy jabý týraly másele ázirge qarastyrylǵan joq. Ótken aptada oblys ortalyǵynda 40 jaǵdaı tirkeldi. 100 myń turǵynǵa 50-den asqanda ǵana qatań is-sharalar qoldanylady. Qazirgi kórsetkish – 18. Búginde 3 aýdan ortalyǵynan basqa, Shal aqyn aýdanyndaǵy Povozochnoe, Taıynsha aýdanyndaǵy Krasnokıevka jáne Aqjar aýdanyndaǵy Lenıngradskoe eldi mekenderinde karantındik shekteýler kúsheıtildi. Olarda naýqastanǵandar 3-5 adamnan asyp ketken», - deıdi SQO Taýarlar men kórsetiletin qyzmetterdiń sapasy men qaýipsizdigin baqylaý departamenti bóliminiń bastyǵy Arman Kúshbasov.
Karantındik shekteýler kúsheıtilgen eldi mekenderdiń keıbirine ǵana aýdandyq sanıtarııalyq dárigerlerdiń sheshimimen blokposttar qoıylǵan. Desek te, bul eldi mekenderde turǵyndardyń júrip-turýy shekteldi. Sondaı-aq resmı jáne jekemenshik jolaýshy tasymaldaýshylarǵa basqa eldi mekenderge jáne Petropavlǵa jolaýshy tasymaldaýǵa tyıym salyndy.
Ótken táýlikte SQO-da KVI juqtyrǵan 14 adam tirkeldi. Mamandardyń aıtýynsha, olardyń beseýi Reseıden kelgender.
«Shekaradan ótkender PTR-test tapsyrady, karantınge alynady. Juqtyrǵany anyqtalǵan jaǵdaıda Reseı azamaty bolsa – eline qaıtarylady. Keshe syrttan kelgen 5 adamda anyqtaldy, olardyń úsheýi SQO, ekeýi Aqmola oblysynyń turǵyndary. Barlyǵynda aýrý belgileri bolmaǵan. Qalǵan toǵyz adamnyń bireýi josparly túrde statsıonarǵa jatý aldynda tekseristen ótip, anyqtaldy. Qalǵan jaǵdaılarda naýqastar klınıkalyq sımptomdarmen, pnevmonııamen, jedel respıratorlyq vırýstyq ınfektsııa belgilerimen kelgen», - deıdi SQO Taýarlar men kórsetiletin qyzmetterdiń sapasy men qaýipsizdigin baqylaý departamenti bóliminiń bas mamany Merýert Atambaeva.
Buǵan deıin SQO-da karantındik shekteýler kúsheıtilip, kóptegen nysannyń jumys kestesine ózgeris engenin aıtqan edik.
