SQO-da tabıǵatty qorǵaý zańnamasyn buzýdyń 600-ge jýyq deregi tirkeldi
PETROPAVL. QazAqparat – Soltústik Qazaqstan oblysynda jarty jyldyń ishinde tabıǵatty qorǵaý zańnamasyn buzýdyń 596 deregi anyqtaldy, - dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtseıler múddeli organdarmen birlese reıdke shyǵý nátıjesinde bıyl ań aýlaý erejelerin buzýdyń 354 faktisin anyqtady. Kóp jaǵdaıda soltústikqazaqstandyqtar tıisti qujatsyz ań aýlaıdy, atap aıtqanda, ańshy kýáligi men qarýǵa ruqsat bolmaı jatady. Qarýdy jınalǵan jáne oqtalǵan qalpynda tasymaldaý, mas kúıde ań aýlaý - jıi kezdesetin zańbuzýshylyqtardyń qatarynda. Áýesqoı balyqshylar da zań buzýshylyqtarǵa jol berip jatady.
«Sý bógetteri men kópirlerdiń mańynda, kól tarmaqtarynda balyq aýlaýǵa tyıym salynǵanyn atap ótken jón. 6 aıdyń ishinde oblysta balyq aýlaýǵa tyıym salynǵan 650 metr monojipten jasalǵan aý tárkilendi», - deıdi SQO PD jergilikti polıtsııa qyzmeti basqarmasy tabıǵatty qorǵaý polıtsııasy tobynyń aǵa ınspektory Ashat Qojabaev.
Sondaı-aq, jyl basynan zańsyz aǵash kesýdiń 2 faktisi tirkeldi. Aqqaıyń aýdanynyń 36 jastaǵy turǵyny «ZıL» júk kóligimen qaıyńdy ruqsat qaǵazdarynsyz tasymaldaǵan. Materıal jınastyrý barysynda 44 jastaǵy taǵy bir aýyl turǵynynyń qaıyńdy zańsyz kesip alǵany anyqtaldy, oǵan qatysty ákimshilik hattama toltyryldy.
Jalpy 6 aıdyń ishinde SQO polıtseıleri tabıǵatty qorǵaý salasynda 596 túrli quqyq buzýshylyq anyqtady.
