SQO-da syrqattarǵa táýligine qosymsha 850 ottegi ballony qajet
SQO densaýlyq saqtaý basqarmasy basshysynyń orynbasary Nurlan Aımanovtyń aıtýynsha, óńirdiń ınfektsııalyq statsıonarlarynda qazir 707 naýqas bar. Olardyń 75-i jansaqtaý bólimshesinde jatyr. Budan basqa 396 adam ottegi ballondaryna táýeldi.
«Qazir bir táýlikte 850 ottegi ballony jumsalady, bul ottegi stansalaryn eseptemegende. Máselen oblystyq kópsalaly aýrýhana ottegi stansasynan bólek táýligine shamamen 120-200 ottegi ballonyna deıin qoldanady. Petropavl qalalyq kópsalaly aýrýhananyń ınfektsııalyq statsıonaryna ottegi stansasyna qosymsha táýligine 180-250 ottegi ballony qajet. Alaıda bul kórsetkish únemi aýysyp otyrady, óıtkeni syrqatqa túske deıin nemese tústen keıin bul ballonnyń qajeti bolmaýy múmkin. Ottegi stansalaryn salý bizdiń jumysymyzdy jeńildetti. Eger olar bolmaǵanda biz bir táýlikte qoldanylatyn ottegi ballondaryn eń keminde 5 ese arttýymyz kerek bolar edi», - deıdi Nurlan Aımanov.
Mamannyń sózine qaraǵanda, oblysta naýqastardy qajetti ottegimen qamtýda másele joq.
«Sáýir aıynda biz barlyq aýrýhanalardy ottegi ballondaryn jetkizetin belgili kompanııalarmen kelisimge otyrýyn mindettedik. Infektsııalyq statsıonarlar tolyp, ondaǵy barlyq syrqattarǵa ottegi ballondary qajet bolǵan jaǵdaıda da biz qamtı alamyz, kelisimge otyrǵanda biz munyń bárin eskerdik», - deıdi dáriger.
Statsıonarlarda em alyp jatqan syrqattardyń 28-i – bala. Olardyń arasynda aýyr halde jatqandar joq. Sondaı-aq 11 júkti áıel kúni-túni dárigerlerdiń baqylaýynda. Olardyń 9-ynyń jaǵdaıy ortasha bolsa, ekeýiniń jaǵdaıy nashar.