SQO-da syrqat áıeldiń emine jınalǵan aqshany zańsyz ıemdengen turǵyn ustaldy
PETROPAVL. QazAqparat – Petropavlda eki kúndik «Kontrafakt» jedel-profılaktıkalyq is-sharasy aıasynda polıtseıler alaıaqtyqtyq, avtorlyq jáne sabaqtas quqyqty buzý, quqyqqa syıymsyz jolmen aqparatqa qol jetkizý faktileri boıynsha 10 qylmysty ashty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, krımınaldyq polıtsııa basqarmasynyń qyzmetkerleri 300 myńnan astam teńgeni aldaý arqyly ıemdengen 34 jasar petropavldyqty ustady. Er adam tanystarynan oblys ortalyǵyndaǵy bir turǵynnyń anasyna shetelde qymbat operatsııa jasatý úshin aqsha jınap jatqanyn estıdi. Telefon arqyly habarlasyp, klınıka jáne dárigerlermen baılanysty uıymdastyrýshylyq máselelerdi sheshýge kómegin usynady. Osy maqsatta operatsııaǵa aldyn ala tólem jasaý kerektigin aıtady. Al aqsha kartochkaǵa túskennen keıin er adam baılanysqa shyqpaı qoıǵan. Jedel-izdestirý is-sharalary nátıjesinde ony polıtseıler ustady. Qazirgi ýaqytta qala turǵyny tergeý ızolıatoryna qamaldy, sotqa deıingi tergeý júrgizilý ústinde.
Sondaı-aq, oblys polıtseıleri Petropavl qalasynyń turǵyndaryna qatysty ınternet-alaıaqtyq jasaǵan Almaty oblysynyń 27 jastaǵy turǵynyn anyqtady. Jarnama berý saıtynda ol avto bólshekterdi satatyny týraly habarlandyrý ornalastyrǵan. Keıin jetkizilim úshin aldyn ala tólemdi alyp, baılanysqa shyqpaı qoıady. Kúdiktiniń júrgen jeri anyqtaldy. QR QK 190-baby 2-b. «Alaıaqtyq» boıynsha sotqa deıingi tergep-tekserý júrgizilip jatyr.
SQO PD Krımınaldyq polıtsııa basqarmasy bastyǵy Petr Klımovtyń aıtýynsha, «Kontrafakt» respýblıkalyq operatsııasy turaqty ótkiziledi, onyń maqsaty – aqparattyq tehnologııalardyń kómegimen jasalǵan qylmystardy ashý, aqparattandyrý jáne baılanys salasyndaǵy krımınalǵa qarsy turý, sondaı-aq avtorlyq jáne sabaqtas quqyqty buzýǵa qarsy kúres jónindegi sharalardy kúsheıtý.
Polıtseıler qaskóılerdiń qurbanyna aınalmas úshin birqatar tıimdi keńesterdi esten shyǵarmaýdy eskertedi. Máselen, ózderin menedjer, banktiń qyzmetkeri nemese qaýipsizdik qyzmetkeri retinde tanystyrǵan tulǵalardan kelip túsken kúmándi qońyraýlar men habarlamalarǵa qatysty birden sheshim qabyldap, úreıge boı aldyrmaý qajet.
«Habarlasyp turǵan adamǵa bárin egjeı-tegjeıli oılastyrý úshin qosymsha ýaqyt kerektigin aıtqan jón. Qandaı jaǵdaı bolmasyn, qupııa málimetti – JSN, PIN-kod, bank kartasyn rastaıtyn kodty, shottyń nómirin, áleýmettik jelilerdegi logın men qupııasózdi eshkimge aıtpaý kerek. Mámile jasamas buryn saıttaǵy habarlandyrýdy zerdelep, aldyn ala tólem aýdarýǵa kelispeý qajet. Sondaı-aq, kompıýter men gadjetterde vırýsqa qarsy baǵdarlamany ornatyp, kúmándi faıldardy júktemegen jón. Budan bólek, jeke málimetti bógde adamdardan qorǵaý maqsatynda, smartfonǵa parol ornatqan durys», - dep atap ótti Petr Klımov.
Jalpy eki kúnniń ishinde tártip saqshylary alaıaqtyqtyq, avtorlyq jáne sabaqtas quqyqty buzý, quqyqqa syıymsyz jolmen aqparatqa qol jetkizý faktileri boıynsha 10 qylmysty ashty.
