SQO-da sybaılas jemqorlyq basym úsh sala anyqtaldy
QR Sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń málimetinshe, agenttik tóraǵasynyń birinshi orynbasary Dmıtrıı Malahov sybaılas jemqorlyq táýekelderiniń kartasynda kórsetilgen halyq úshin asa mańyzdy problemalarǵa toqtaldy. Bul máselelerdi joıýda jergilikti atqarýshy organdar oblystyq departamentpen ózara áreket etip, jumystaryn qorytyndylady.
Nátıjesinde óńir úshin jemqorlyǵy basym 3 sala anyqtaldy, olar: joldar men ınfraqurylym, aýyl sharýashylyǵy, ekonomıka jáne qarjy.
«Aýyl sharýashylyǵyna únemi sýbsıdııa jáne nesıe beriledi. Sondyqtan olardy úlestirerde sybaılas jemqorlyqqa jol berilýi múmkin. Qarjy men ekonomıka, jol jáne ınfraqurylym salalarynda da barmaq basty, kóz qysty áreketter kóp kezdesedi. Ony ınjenerlik jeliler men jol sapasyna qarap baǵamdaýǵa bolady. Sondaı-aq turaqtandyrý qorynyń jumysyna qatysty da kóptegen máseleler týyndaıdy», - dedi Dmıtrıı Malahov.
Dmıtrıı Malahov Sybaılas jemqorlyqqa qarsy qyzmet tek qylmystyq isterdi qozǵaý maqsatyn kózdemeıtinin, eń bastysy – azamattar úshin bıýdjet esebinen salynyp jatqan nysandardy sapaly turǵyzý jáne belgilengen merzimde tapsyrý ekenin atap ótti.
Sońǵy jyldary SQO-da sybaılas jemqorlyq faktileri azaıǵan. Bul jalpy respýblıkalyq tendentsııa. Qoǵamdyq baqylaý sharalary osylaısha óz jemisin berip jatyr. Óıtkeni, búginderi belsendi azamattar jol salý, sý tartý jáne qurylys jumystaryn qadaǵalap, tipti memlekettik satyp alýlardy tekserip otyrady.
«Biz qaramaǵyndaǵylardyń áreketi úshin basshylary jaýapkershilikke tartylýy tıis degen pozıtsııany ustanamyz. 2020 jyly oblys ákiminiń orynbasary Anton Fedıaev jáne Aqjar aýdanynyń ákimi Erbatyr Madıarov óz qyzmetterinen bosatyldy. Ótken jyly óńirde 9 aı ishinde sybaılas jemqorlyqtyń 83 faktisi tirkelse, bıyl 38 derek anyqtaldy. Bul aldyn alý jumystarynyń nátıjesi dep bilemiz», - dedi SQO ákimi Qumar Aqsaqalov.
