SQO-da sýyq tıip aýyrǵandardyń jartysynan astamy - balalar
SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, óńirde epıdemıologııalyq jaǵdaı JRVI men tumaýdan syrqattanýshylyqtyń maýsymdyq ósýimen sıpattalady. Desek te, oblysta sýyq tıip aýyr ótken jyldyń uqsas merzimimen salystyrǵanda 1,6 ese kóp. Aýyrǵandardyń basym bóligi – balalar.
Sondaı-aq bıyl tumaýmen aýyrǵandar sany artqan. Alǵashqy jaǵdaı qazan aıynyń ortasynda tirkeldi.
«Oblysta barlyǵy V tıpti tumaýdyń 245 jáne A tıpti tumaýdyń 17 zerthanalyq rastalǵan jaǵdaılary tirkeldi. Naqtyraq aıtar bolsaq, «shoshqa» tumaýynyń 13, «gonkong» tumaýynyń 4 jaǵdaıy anyqtaldy. Aýyrǵandardyń eshqaısy tumaýǵa qarsy ekpe almaǵan.
Naýqastardyń ishinde 49 júkti áıel, bul - 19% bolsa, 32% nemese 83 adam - 14 jasqa deıingi bala», - deıdi Arman Kúshbasov.
Tumaýmen aýyrǵandardyń 139-y – Petropavl turǵyny.
«Aýyrmaý úshin betperde kııýge, áleýmettik qashyqtyqty saqtaýǵa, múmkindiginshe adamdar kóp jınalatyn jerlerge barmaýǵa, jeke gıgıena erejelerin saqtaýǵa, sonyń ishinde qoldy sabynmen jıi jýýǵa keńes beremin. Óıtkeni tumaý vırýsy aýa tamshylary arqyly ǵana emes, sonymen qatar turmystyq zattar arqyly da taralady.
Sonymen qatar ımmýnıtetti barlyq qol jetimdi tásilder - dene shynyqtyrý, jumys jáne demalys rejımin saqtaý, tolyqqandy uıqy, mıkroelementter men dárýmenderdi, ásirese «S» dárýmenin kóbirek paıdalanǵan jón», - deıdi Arman Kúshbasov.