SQO-da sýyq tıip aýyrǵandar sany 2 esege ósti
PETROPAVL. QazAqparat – Soltústik Qazaqstan oblysynda sońǵy úsh aıda jedel respıratorlyq vırýstyq ınfektsııany juqtyrýdyń 20,5 myń jaǵdaıy tirkeldi, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde JRVI boıynsha epıdemıologııalyq jaǵdaı syrqattanýshylyqtyń maýsymdyq ósýimen sıpattalady. Epıdemııalyq maısym 1 qazan bastaldy. Osy kúnnen bastap JRVI–diń 20483 jaǵdaıy tirkelgen. Bul ótken jyldyń uqsas kezeńimen salystyrǵanda 42 %-ǵa artyq. Byltyr osy aralyqta 14390 adam aýyrǵan. Naýqastardyń basym bóligi - 14 jasqa deıingi balalar, bul 13416 jaǵdaı nemese barlyq syrqattanǵandardyń 66 %.
Tumaý boıynsha da jaǵdaı máz emes. Alǵashqy naýqas 14 qazanda anyqtalǵan. Jalpy oblysta barlyǵy V tıpti tumaýdyń 244 jáne A tıpti tumaýdyń 2 zerthanalyq rastalǵan jaǵdaılary tirkeldi. Aıta keterligi, aýyrǵandardyń eshqaısy tumaýǵa qarsy ekpe almaǵan.
Sonyń ishinde naýqastardyń 46-sy júkti áıel, bul – 18 %, al 31 % nemese 76-sy - 14 jasqa deıingi bala.
Syrqattanǵandardyń teń jartysy Petropavl turǵyndary.
Bıyl tumaýdyń aldyn alý maqsatynda óńirge reseılik vaktsınanyń 75 myń danasy alyndy. Ol qaýip tobyna jatatyn medıtsına qyzmetkerlerine, medıtsınalyq uıymda dıspanserlik esepte turǵan balalarǵa, balalar úıleriniń, sábıler úıleriniń balalaryna, qarttar úıleriniń kontıngentine, esepte turǵan oqýshylarǵa, epıdemıologııalyq kórsetkishter boıynsha júkti áıelder men qart adamdarǵa egildi.
