SQO-da sýyq tıgizgender men tumaý juqtyrǵandardyń sany artyp keledi
PETROPAVL. QazAqparat – Soltústik Qazaqstan oblysynda epıdemııalyq maýsym bastalǵaly jiti respıratorly vırýstyq ınfektsııany juqtyrýdyń 11915 jaǵdaıy tirkelse, sońǵy birer aptada tumaý juqtyrǵandardyń sany 44-ke jetti, dep habarlaıdy QazAqparat tilshisi.
SQO Taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń habarlaýynsha, sýyq tıgizip dáriger kómegine júgingenderdiń 68,6 paıyzy - 14 jasqa deıingi balalar. Onyń ishinde 19 paıyzy - oqýshylar. Alaıda oqýshylar arasynda jiti respıratorly vırýstyq ınfektsııany toptyq juqtyrý anyqtalmaǵandyqtan bilim ekemelerinde oqý protsesi toqtaǵan joq.
Tumaýǵa qatysty 307 synama tekserilip, sonyń 44-inde juqpaly dert zerthanalyq túrde rastaldy. Onyń 5-eýi - «A» tıpti bolsa, qalǵan 39-y - «V» tıptes tumaý.
«Epıdemııalyq maýsym bastalǵaly beri tumaýdyń 44 jaǵdaıy anyqtaldy. Onyń 18-i - balalar arasynda, 15-i - júkti áıelder arasynda tirkelip otyr. Osy 44 jaǵdaıdyń barlyǵynda da naýqastar tumaýǵa qarsy ekpe almaǵan. Budan basqa, sońǵy bir aptanyń ishinde jiti respıratorly vırýsty ınfektsııalardyń 1002 jaǵdaıy tirkeldi. Aýyrǵandardyń negizgi bóligi -balalar», - dedi SQO Taýarlar men kórsetiletin qyzmetterdiń sapasy men qaýipsizdigin baqylaý departamenti bóliminiń bas mamany Merýert Atambaeva.
Byltyr juqpaly aýrýmen kúreske oblystyq bıýdjetten 52,5 mln astam teńge bólinip, «Grıppol plıýs» vaktsınasynyń 60 myń dozasy satyp alyndy. 17 myńnan astam bala jáne 44 myńǵa jýyq eresek adam ekpe aldy.
Taǵy 1055 adam jumys berýshiniń esebinen, 10 adam óz qarajatyna vaktsına saldyrdy.
