SQO-da sýy tasýy múmkin ózenderde jarylys jumystary júrgizildi
PETROPAVL. QazAqparat – Soltústik Qazaqstan oblysynda sýy tasýy múmkin ózenderdiń bes ýchaskesinde muzdy jarý jumystary júrgizildi, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, óńirde kóktemgi sý tasqynynyń aldyn alý jumystary qyzý júrgizilip jatyr. Qaýipti tómendetý maqsatynda Ǵ.Músirepov aýdanyndaǵy ózenderdiń 5 ýchaskesinde profılaktıkalyq jarylys jumystary júrgizildi. ıAǵnı Aqanburlyq ózeniniń Esil ózenine quıatyn jerinde, Grıgorevka eldi mekeniniń mańynda, Aqanburlyq jáne Sharyq ózenderi qosylatyn jerde jáne Raısovka eldi mekeniniń mańyndaǵy Sharyq ózeninde mamandar kúni boıy jumys istedi. Osy maqsatqa 122 kg jarylǵysh zat – petrogen paıdalanyldy.
«Ózenderdegi muzdardy osy ýaqytta jylda jaramyz. Bizdiń mindetimiz – muz keptelisin týdyrmaý jáne sý deńgeıiniń kúrt kóterilýine jol bermeý. Búgin jarylys jumystaryn júrgizgen ýchaskelerde ózen sýy tasysa aýyldardyń shetki kósheleriniń tómen ornalasqan ýchaskelerine qaýip tóndiredi. Sáýir aıynda sý tasqyny kezinde «Kókshe-BÝR» JShS mamandary bizdiń aýdanymyzda kezekshilik etedi jáne qajet bolǵan jaǵdaıda jarylys jumystaryn júrgizedi», - deıdi Ǵ.Músirepov atyndaǵy aýdan ákimi Aǵzam Tastemirov.
SQO TJD bastyǵy Ramıl Kamalov Chıstopole, Rýzaev jáne Novoıshım aýyldyq okrýgterinde bolyp, tehnıkanyń daıyndyǵyn, ótkizilgen ınjenerlik is-sharalardy tekserdi.
«Búginge deıin aýdannyń eldi mekenderinen 27 myń tekshe metrden astam qar shyǵaryldy, 112 km sý ótkizý qubyrlary tazartyldy. Jergilikti ákimdikter kóktemgi sý tasqynyna daıyndyqty tıisti deńgeıde jaýapkershilikpen júrgizip jatyr», - deıdi Ramıl Kamalov.
Departament basshysy Aıyrtaý aýdanynda da bolyp, sý tasqyny qaýpi bar eldi mekenderdi - Gýsakovka, Konstantınovka, Imantaýdy aralap, Babyqburlyq ózeni men Imantaý kólin kórdi. Tótenshe jaǵdaıǵa daıyndyqty tekserdi.
