SQO-da suranysqa ıe dári-dármekti qymbat baǵaǵa satyp kelgen
PETROPAVL. QazAqparat – Soltústik Qazaqstan oblysynda medıtsınalyq maskany 150 teńgeden, suranysqa ıe preparattardy 200-300 teńgege qymbatqa satqan dárihanalar anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, dári-dármek alypsatarlarymen kúres kúsheıgen. Polıtsııa bólinisteri dárihanalardy tekserip, áleýmettik jelilerdi baqylaýǵa alǵan. Maqsat - dárilik preparattardy zańsyz saýdalaý jáne olardy qymbat baǵamen satý derekterin anyqtaý.
Oblys aýmaǵyndaǵy 256 dárihanaǵa reıd júrgizý barysynda baǵany negizsiz kóterip satýdyń 8 faktisi anyqtaldy. Petropavl qalasyndaǵy dárihanalardyń birinde «Grıppostad» dárisi 1631 teńgeniń ornyna 1960 teńgege satylǵan. Kelesi bir dárihanada «Aspırın Kardıo» úshin 1670 teńge suraǵan. Onyń bekitilgen baǵasy – 1382 teńge.
Mamlıýt aýdanynda «Kardıomagnıl», «Trombopol», «Aspırın Kardıo», «Efferalgan» sııaqty dári-dármekterdiń, sondaı-aq medıtsınalyq betperdelerdiń baǵasy negizsiz kóterilip satylǵan. Medıtsınalyq maskany 118 teńgeden asyryp satýǵa bolmaıdy. Jambyl aýdanyndaǵy aýyldardyń birinde ol 150 teńgeden satylǵan.
Monıtorıng barysynda vırýsqa qarsy preparattar men maskalardyń azyq-túlik dúkenderinde, oblys turǵyndarynyń úılerinde saýdalanǵany anyqtaldy.
«Medıtsınalyq preparattar belgili bir temperatýrada saqtalýy tıis, mundaı jaǵdaıda taýardyń qaýipsizdigi týraly aıtýdyń ózi qıyn. Polıtsııanyń jumysy adamdardyń ómiri men densaýlyǵyn saqtaýǵa, olardyń múddelerin qorǵaýǵa baǵyttalaǵan. Alypsatarlarmen kúres búginde bizdiń basym baǵyttarymyzdyń birine aınaldy», - deıdi SQO PD Krımınaldyq polıtsııa basqarmasy bastyǵynyń mindetin atqarýshy Marat Jumalıev.
Monıtorıngtik top tanymal ınternet-servısteri men messendjerlerdegi 139 habarlandyrýdy tekserdi. Nátıjesinde oblys boıynsha barlyǵy 14 ákimshilik quqyq buzýshylyq anyqtaldy. Materıaldar protsessýaldyq sheshim qabyldaý úshin SQO boıynsha Medıtsınalyq jáne farmatsevtıkalyq qyzmetti baqylaý departamentine jiberildi.
