SQO-da sýpermarketterge teplovızorlar qoıylyp jatyr
PETROPAVL. QazAqparat – Soltústik Qazaqstan oblysynda úlken saýda oryndarynyń kireberisterine teplovızorlar qoıylyp jatyr. Dene qyzýy bar turǵyn sýpermarketke kirgizilmeıdi, dep habarlaıdy QazAqparat tilshisi.
SQO ákimi Qumar Aqsaqalov óńirde qaýipti indettiń taralýyna tosqaýyl qoıý maqsatynda qolǵa alynǵan is-sharalar jóninde baıandady.
«Oblysta keshe bir adam emdelip, úıine jiberildi. Qazir aýrýhanada 24 naýqas bar, jaǵdaılary birqalypty. Aralarynda aýyr naýqastar joq.
Degenmen, 10 orynǵa arnalǵan jansaqtaý bólimshesin daıyndap qoıdyq. Olarǵa jasandy tynys alý apparatynyń 10-yn ázirledik. Jýyrda jańa 5 apparat aldyq. Barlyǵy oblys boıynsha 74 apparat bar. Dárigerlerimiz úlken jumys atqarýda. Olarǵa alǵysymdy bildiremin. Naýqastardy emdeıtin dárigerler jumystan keıin birden qonaq úıge jetkiziledi. Dalaǵa shyqpaıdy, úılerine barmaıdy. Qonaq úıde dárigerlerge barlyq jaǵdaı jasalǵan», - dedi dedi oblys ákimi «QYZYLJAR» telearnasynyń tikeleı efırinde.
Oblysta shekteý sharalary qatańdatyldy. Tótenshe jaǵdaı rejımin buzýdyń 88 deregi anyqtaldy. Onyń 42-sinde turǵyndar qoǵamdyq oryndarda qydyryp júrgen. 23-i qamalyp, 32-sine aıyppul salyndy. Taǵy 32-siniń isi ákimshilik sotqa jiberildi.
«Buǵan deıin eskerttik, endi qatań shara qoldanamyz. Qazir saıajaıǵa baryp, ıtti qydyrtatyn ýaqyt emes. Otbasylaryńyzben birge bolyńyzdar. Zeınetkerlerimizge vırýs qaýipti ekenin aıtsaq ta, kóshede júrgen qartardy kóremiz. Aıyppul tólegilerińiz kelmese úıde otyryńyzdar», - dedi Qumar Aqsaqalov.
Petropavldaǵy kásiporyn-mekemelerge, iri saýda oryndaryna teplovızorlar qoıylyp jatyr. Óńir basshysynyń aıtýynsha, dene qyzýy barlar sýpermarketke kire almaıdy. Mundaı jaǵdaıda azyq-túlikti úıge jetkizýge tapsyrys beredi nemese volonterlerdiń kómegine júginýge bolady.
Al «Radýga» JShS dezınfektsııalyq týnnelderdi jasaýdy qolǵa aldy. Sýpermarketterdiń aldaryna ornatylyp jatqan qurylymdar kirgen adamǵa preparatty avtomatty túrde seýip, dezınfektsııalaıdy.
