SQO-da sýyq túskeli 61 myńnan astam adam JRVI-men dárigerge qaralǵan
PETROPAVL. KAZINFORM – Soltústik Qazaqstan oblysynda jedel respıratorlyq vırýstyq ınfektsııany juqtyrǵandar sany ótken jyldyń uqsas kezeńimen salystyrǵanda 1,8 ese ósip otyr.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, epıdemıologııalyq maýsym, ıaǵnı 2023 jylǵy 1 qazannan bastap osy kúnge deıin oblysta JRVI-di juqtyrýdyń 61 201 jaǵdaıy tirkeldi. Byltyr bul dıagnoz 32 947 syrqatqa qoıylǵan.
Naýqastardyń 65% nemese 40 myńǵa jýyǵy - 14 jasqa deıingi bala.
Óńirde tumaýdy juqtyrǵandardyń da qatary artyp keledi. Alǵashqy jaǵdaı 13 qarashada tirkelse, qańtar aıynyń ortasynan bastap aýyrǵandar sany kúrt artty. Qazirgi ýaqytta oblysta A (H3N2) tıpti tumaýdyń barlyǵy 32 jaǵdaıy tirkeldi.
Mamandardyń aıtýynsha, JRVI men tumaý aýrýynyń negizgi belgileri: dene qyzýynyń kóterilýi, jalpy ıntoksıkatsııa, álsizdik, tamaq aýrýy, muryn bitelýi. Mundaıda syrqat ózin-ózi emdemeı, medıtsınalyq kómekke júginýi qajet, dárigerdi úıge shaqyryp, aýrýdy taratpaý úshin naýqas balany balabaqshaǵa nemese mektepke jibermeý kerek. Asqynǵan jaǵdaıda ókpeniń qabynýyna ákelýi múmkin.
