SQO-da sýyq tıip aýyrǵandar sany bir aptada 1,5 ese artty
PETROPAVL. KAZINFORM — Soltústik Qazaqstan oblysynda sońǵy aptada jiti respıratorlyq vırýstyq ınfektsııany juqtyrýdyń 3210 jaǵdaıy tirkeldi.
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, 2024-2025 jylǵy epıdemıologııalyq maýsymda JRVI-men 106 myń adam aýyrǵan. Bul ótken jyldyń uqsas kezeńimen salystyrǵanda 22% tómen. Naýqastardyń eń kóbi 14 jasqa deıingi balalar –71189 jaǵdaı nemese 66,8%.
Sońǵy aptada aldyndaǵymen salystyrǵanda 1,5 esege ósim bar.
2024/2025 jylǵy epıdemııalyq maýsym kezinde tumaýdy 109 adam juqtyrdy. JRVI-men aýyratyn naýqastardan PTR ádisimen basqa da tumaýǵa jatpaıtyn vırýstar anyqtaldy: rınovırýstyń 81 jaǵdaıy, adenovırýstyń 49 jaǵdaıy, paragrıpptiń 32 jaǵdaıy, metapnevmovırýstyń 13 jaǵdaıy, bokavırýstyń 7 jaǵdaıy tirkeldi.
— «Tumaý, jiti respıratorlyq vırýstyq ınfektsııalar jáne COVID-19 koronavırýs ınfektsııasy boıynsha 2025-2026 jyldardyń epıdemııalyq maýsymynda sanıtarııalyq-epıdemııaǵa qarsy, sanıtarııalyq-profılaktıkalyq is-sharalar júrgizý týraly» Bas memlekettik sanıtarlyq dárigeriniń qaýlysy qabyldandy.
Qaýly JRVI, tumaý jáne COVID-19 boıynsha epıdemııalyq maýsym kezeńinde profılaktıkalyq jáne epıdemııaǵa qarsy is-sharalardy ótkizýdi kózdeıdi. Onyń ishinde: medıtsınalyq uıymdarda: kireberiste«súzgilerdiń» jumysyn qamtamasyz etý, maskalardy paıdalaný, antıseptıkterdiń bolýy;
tumaý, JRVI jáne COVID-19 kórinisteri, olardyń asqynýlary bar júkti áıelder men 1 jasqa deıingi balalarǵa kúndelikti patronajdy, olardy ýaqtyly emdeýge jatqyzýdy qamtamasyz ete otyryp, úıde shaqyrýlarǵa birinshi kezekte qyzmet kórsetý, — deıdi Áset Jumataev.
Mamannyń aıtýynsha, jalpy bilim berý uıymdarynda bir synyptaǵy oqýshylar arasynda 30% jáne odan artyq JRVI-men aýyrǵandar tirkelgen jaǵdaıda, oqýshylar onlaın oqytýǵa aýystyrylady.
— Maýsymdyq tumaý kezinde dene temperatýrasynyń kenetten kóterilýi, jótel, bas aýrýy, bulshyqet pen býynaýrýy, qatty álsizdik, tamaq aýrýy jáne murynnyń bitelýi baıqalady.
Qazirgi ýaqytta aldyn alýdyń tıimdi ádisteriniń biri — vaktsınatsııa. Tumaýǵa qarsy vaktsınatsııa negizgi aýrýdyń asqynýynan, aýrýhanaǵa jatqyzýdan jáne ólimnen qorǵaıdy, — deıdi Áset Jumataev.
Osyǵan oraı23 qyrkúıekten bastap oblysta tumaýǵa qarsy ımmýndaý naýqany bastaldy. Bıyl da reseılik «Grıppolplıýs» vaktsınasynyń 60 myń dozasy satyp alyndy.
Buǵan deıin SQO-da jedel járdem qyzmetine jańa fýnktsııa engizilgenin aıtqan edik.