SQO-da sýyq tıip aýyrǵandar ótken jylmen salystyrǵanda eki ese ósti
PETROPAVL. KAZINFORM – Soltústik Qazaqstan oblysynda ótken bir aptada jedel respıratorlyq vırýstyq ınfektsııamen bes myń adam dárigerge qaralǵan.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde JRVI boıynsha epıdemıologııalyq jaǵdaı turaqsyz, syrqattanǵandar maýsymǵa baılanysty artqan.
Ótken aptada epıdemıologııalyq maýsym bastalǵaly JRVI men aýyrǵandar sany 61 201 adamǵa jetse, búgingi kúni syrqattanǵandar sany 66 188-ge jetken.
«Byltyr dál osy ýaqytta JRVI juqtyrǵandardyń jalpy sany 34 517 adamǵa jetken. Bıyl shamamen eki esege ósip otyr. Naýqastardyń 65% - 14 jasqa deıingi balalar. JRVI men tumaý aýrýynyń negizgi belgileri - joǵary temperatýra, jalpy ıntoksıkatsııa, álsizdik, tamaq aýrýy, muryn bitelýi», - deıdi sanıtar dárigerler.
Ótken bir aptanyń ishinde A (H3N2) tıpti tumaý dıagnozy 13 adamǵa qoıylyp, bıylǵy epıdemıologııalyq maýsymda syrqattanǵandar sany 45-ke jetken.
«JRVI men tumaýdyń alǵashqy belgilerinde ózin-ózi emdeýge bolmaıdy, medıtsınalyq kómekke júginý qajet, dárigerdi úıge shaqyrý kerek, aýrýdy taratpaý úshin naýqas balany balabaqshaǵa nemese mektepke jibermeý kerek. Aýrý asyqynǵan jaǵdaıda ókpe qabynýy múmkin. JRVI men tumaýdyń aldyn alý úshin úı-jaıdy kún saıyn jeldetý, qoldy muqııat jýý, antıseptık quraldardy paıdalaný, aýrýdyń kóterilý kezeńinde adamdar kóp jınalatyn is-sharalardan bas tartý ne betperde taǵý, ımmýnıtetti nyǵaıtý, sportpen shuǵyldaný jáne uıqy men tamaqtaný sapasyn baqylaý qajet», - deıdi mamandar.
