SQO-da sýǵa shomylý maýsymynda bes adam qaza tapty

PETROPAVL. QazAqparat – Soltústik Qazaqstan oblysynda sýǵa shomylý maýsymy aıaqtaldy. Bıyl bes adamnyń qazasy sýdan boldy, taǵy 39 adamdy qutqarýshylar aman alyp qaldy, dep habarlaıdy QazAqparat tilshisi.

SQO Tótenshe jaǵdaılar departamenti azamattyq qorǵanys basqarmasy basshysynyń mindetin atqarýshy Qýat Mahmetovtyń aıtýynsha, bıyl Qazaqstanda jaz mezgilinde 177 adam, sonyń ishinde 53 bala qaza tapty. SQO qutqarýshylary oqys oqıǵalardyń aldyn alý úshin halyq demalýǵa kóp baratyn kólderde kezekshilik atqardy. Nátıjesinde 39 adamnyń, sonyń ishinde 3 balanyń ómirine arasha tústi. Biraq óńirdiń ózen-kólderinde 5 adam sýǵa ketti.

«Bizdiń maqsatymyz halyqty barynsha habardar etý boldy. Sýǵa shomylý maýsymy barysynda BAQ ókilderiniń qatysýymen 84 brıfıng ótti. Kóptegen maqala jáne telearnalarda beınematerıaldar jaryqqa shyqty. Budan basqa 5 myńǵa jýyq reıd uıymdastyryldy. TJD mamandary men polıtseılerdiń birikken aldyn alý reıdteri ótti. Qoǵamdyq oryndarda bolý tártibin buzǵany úshin 502 adam ákimshilik jaýapkershilikke tartyldy.

Budan basqa ortaq sý paıdalaný tártibin elemegen 303 adam jazaǵa tartyldy», - dedi óńirlik kommýnıkatsııalar qyzmetinde ótken brıfıngte Qýat Mahmetov.