SQO-da sýǵa shomylý maýsymy jyldaǵydan erte bastaldy
PETROPAVL. QazAqparat – Soltústik Qazaqstan oblysynda kúnniń ysýyna baılanysty sýǵa shomylý maýsymy erte bastaldy. Ózen-kól basynda demalýshylardyń qarasy qalyń, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, óńirde 60 shaqty ózen, 2 myńnan astam kól jáne 100-den artyq qazanshuńqyr bar. Solardyń ishinde demalýshylar úshin eń qaýiptileri – Esil ózeni, Pestroe, Solenoe, Lebıaje, Úlken Torańǵul, Shalqar jáne Imantaý kólderi.
«SQO-da kúnniń ysýyna baılanysty sýǵa shomylý maýsymynyń ashylýyn kútpeı sýǵa túsip jatqandar bar. Jalpy sýǵa shomylý maýsymy resmı túrde 1 maýsym bastalady. Osyǵan baılanysty qaýipsizdik sharalaryn kúsheıttik. Bıyl sýǵa túsýge bolatyn 58 oryn belgilendi. Byltyr sýǵa shomylý maýsymynda 9 adam, sonyń ishinde bir bala mert boldy. Olardyń barlyǵy arnaıy belgilenbegen jerlerde shomylǵan. Jalpy sońǵy 7 jyldyń ishinde 180 adam, sonyń ishinde 24 bala sýǵa ketti», - deıdi SQO TJD bastyǵynyń orynbasary Murat Qanǵojınov.
Oqys oqıǵalardyń aldyn alý jáne demalýshylardy eskertý maqsatynda halyq kóp jınalatyn ózen-kólderge reıdter uıymdastyrylyp jatyr. Oǵan «Jas Otan» jastar qanaty fılıalynyń, Jastar resýrstyq ortalyǵynyń ókilderi jáne polıtsııa qyzmetkerleri kirgen.
Tek ótken demalys kúnderi qutqarýshylar 32 reıd ótkizip, 600-den astam jadynama taratty.
